Irrfan Khan adenba film ka tanga thinendanga mali

Mumbai,October 18, 2016 : Pakistan actress Saba Qamar aser actor Irrfan Khan nati shilem agiba film “Hindi Medium” thinena mayu, ta Irrfan indang official otongdari ashi.
Osang kar ajanga ashiba agi Irrfan-i Hollywood film “Inferno” tangokba temer külen ang Bollywood project tem tenzüktsü liasü saka tang India nung Pakistan actor tem shilem magidaktsütsü ta sangdongba sülen item project tem thinenogo aser kodang nungiang tenzüktsüar memetet ta prokshiba sülen otongdari iba osang tejangja metetdaktsü.
Mongulbarnü official sangdong ka ajanga ashiba agi, iba osangji olulu lir kechiba süra iba film tangokzükogo.
Iba sangdong nung: “Irrfan ya tang Tanuja Chandra aser Homi Adajania na den shilem agitsü aliba film nung kanga bendanga agüja inyakdar. Pai shilem agiba film tem tangokpeter thinenogo ta asübaji tiyazü lir. Pai shilem agiba film tem ajak mapang shitak nung kecha anünga meyui tangokzüker,” ta shia lir.
Tang ya Oscar sempet angur actor Tom Hanks den külemi shilem agiba film “Inferno” atema nüburtemi Irrfan nem tenüngsang agütsüba mapang ka lir.