Irrfan Khan-i Arvind Kejriwal den ajuruteptsü

Mumbai, July 17, 2016 : Actor Irrfan Khan-i Delhi Chief Minister Arvind Kejriwal den July 19, 2016 nü (Mongulbar) ajurutepa pa film “Madaari” dak sentakba nung interview ka agitsü.
Taoba hopta-a Irrfan-i Bihar yimtiba Patna semdangba mapang RJD tekolaksang, Lalu Prasad den interview ka agia liasü aser pai tan Kejriwal den ajuruteptsü sentong twitter ajanga yanglu.
Irrfan-i, “Nia linük nung yimpur chanu ka lir. Ni nü dang tasüngdangnüba kar lir. Ni nü den ajuruteptsü akoktsü makoktsü,” ta asüngdanga liasü aser Arvind Kejriwal-i menungnangi dang pa den ajuruteptsü mulungsoa langzük.
Kejriwal-i, “Kü office nung Mongulbarnü 11:00 ako nung ajurutepdi,” ta twitter ajanga Irrfan dang ashi.
“Kanga pelar, Mongulbarnüji ajurutepdi,” ta Irrfan-i ano twitter ajangasa ashi.
“Madaari” film nung tebu aser par jabaso na tesentaktep telung tonga ia bushiba aser tia makai jabaso alima nungi pilaba angutsü. Iba film nung Jimmy Sheirgill-i tongti shilem kar agia lir aser July 22, 2016 nü sayatsü sentong lir.
Irrfan-i international film tem nung shilem agiba ajanga alima ajak nung nüngtugu aküm. Pai ano ‘Office of RG’ aser Prime Minister’s Office (PMO) twitter account tem ajanga yimsüsür kar den ajuruteptsü sentong yangludar.