Irrfan Khan-i temang shilemtem tenlatsü ayongzüker

New Delhi, November 27, 2016 : Deobarnü Indian Organ Donation Day nüngtem nung temang shilem tenlatsü asoshi metetdakja Walkathon sentong ka kaogo. Iba sentong actor Irrfan Khan-i flag off sütsü.
Yaküm tenzükba, iba campaign nung ya Irrfan ambassador lir.
Pai, “Ozü kinungertemia timtem ajangshiogo, kanük kinungtsü temang shilem kar mapa meinyaki küma kanga timtem. Imlibilema nenokia temang shilem tenla-a tangar kar taküm nung anisüngzük agüjang” ta Paralympic nung silver medal angula, Deepa Malik den külemi arusang, Irrfan-i sangdong ka ajanga metetdaktsü.
India nung aliba nüburtem tesülen anisüngzükdaktsütsü mechi nung sentong ayongertemi temang shilem tenlaba ajanga tajangzük bener arutsüba metetdaktsütsü atema iba sentong ayong.
“Irrfan amala nisung kati iba ama mapa tajung ajungketba ajanga iba inyakyim ya tongti temetetsü ama züngshir. Iba ama sentong ya asenoki ayonga amungtsü nüngdak. Walkathon ya odang jajatsü atema ayongba masü saka osang ka agütsütsü atema ayongba lir,” ta Malik-i ashi.
Ita 4 tashi iba sentong agia arudang yimti pungu — Gurugram, Mumbai, Mohali, Chennai aser Delhi — tashi nung walkathon ayonga agiogo. Walkaton nung kaketshir nungi tenzüker mapa inyakertem tashi tena liasü.