Irrigation & Flood Control Dept. ajanga Advisor tasenba agizük

Dimapur, Rongchii 11 (TYO): Irrigation & Flood Control department indang Advisor, Namri Nchang-i Rongchii (April) 11, 2018 nü Irrigation & Flood Control indang Chief Engineer office semdang. Kasa mapag Commissioner & Secretary, N. Hushili Sema-i ketdangsüa metetbela sentong ka agi. Iba sentong tenzüka jembiba mapang Hushili Sema-i Advisor den tepela lemsatep aser pa lenisüba kübok department ajanga mapa inyakyim balala nung terenlok angutsü, ta ashi.
Nüburtemi aginüba peritsütsü asoshi staff ajaki mapa meranga inyaktsüla aser district nung ketdangsertem ajak station nung alitsüla ta lai ajungshi.
Iba sentong nung jembiba mapang, terenlok bener arutsü aser nüburtem nüngdakba peritsü asoshi staff temi tali awaloka inyaktsüla, ta Advisor-i ashi. Paisa staff tem dang mapang shidak amshitsü, discipline asütsüla aser iba den külemi mapa meranga inyakba melena kecha mali, ta ashi.
Yimten yimsüsürtem ji arutsü aser aotsü, saka department ji tongtiret ka ama lir, anungji department renloktsü asoshi ketdangsertemi sentong tasen yanglutsüla, ta pai ketdangsertem dang ajungshi.
Irrigation ajanga tzümopungi melemzüktsüba tesemtem nung nisungtemi alu yimteter, anungji iba mapa ya shisa kaa inyaktsüla, ta Advisor-isa shisem.
Sorkar aser Advisor tasen aruba ajanga anüngdaka aliba project tem takok ngua inyaktsü aser terenlok bener arutsü imlar, ta Chief Engineer, IFC, Er, S. Kughato Sema-ia kasa sentong nung ashi.
Küm shia nükjidong balala yur inyaker, saka sentontsü peria manguba ajanga sentongtem takok ngua meinyakteter, ta paisa ashi.
Department inyakyim balalatem power presentation amshia IFC nung SDO, Er. Wapangnaro Imchen-i iba sentong nung sayu aser National hydrology project inyakyim osang, IFC nung EE, Er. Sobu Angami-i agütsü aser IFC Additional Chief Engineer, Er. Tsuktinungsang-i tepela o jembia liasü.