IS anema raratsü atema US mitkartem Raqqa-i yokogo: Carter

Manama, December 10 (Agencies): Syria nung tesep tenteta alir Islamic State (IS) kiralongrar telok anema raradaktsütsü atema par United States (US) mitkar züngsem 200 dak tema Syria kübok Raqqa yimti-i yoksemba osang ka US Defense Secretary, Ash Carter-i tanü, Honibar nü sangoktsüogo.
“Raqqa yimti nung tesep tentet alir IS telok anema tongpang rarar Kurd aser Arab sepaitem den yaritepa, parnoki IS ket nungi Raqqa yimti tanaben takok ngua agidaktsütsü nükjidong nung ozü US mitkar züngsem 200 dak tema Raqqa-i yoksemogo,” ta Carter-i osang jangjashitsü.
IS anema takok ngua raratsüsüa, Syria mitkartem nem tongpang raratsü temerenshiba agütsütsü aser parnok den tongpang raradang yariteptsü atema US-i par mitkar züngsem 300 tashi Syria-i taoba mapang yoka lir aser parnok den yaritepdaktsütsü nükjidong nung tan par mitkar 200 dak temaji yoksemer lir.
Bahrain kübok Manama nung amenba mongdang ka nung shilem agiba sülen osangbener den ajurutepdang Carter-i tanü iba olenji sangoktsü.
Raqqa yimti ya IS teloki par tesepti ama amshir aser par tongti tespeti makzükba ajanga par telok meshi meshia samatsütsü mapatong nung tongti mera agir asütsü.
US mitkartem Syria-i yoksemtsü onükji US Tir, Barack Obama-i taoba hopta agizüka liasü.
“Tan Syria-i yoksemba mitkartemi idakji alir US special operations mitkar 300 den yaritepa, IS telok anema tongpang raratsü mapatong takok ngua inyaktsü alizüng lir,” ta Carter-i shisem.