IS anema raratsüren nung Russia den amaliteptsü mulunga mali: Carter

Italy Defense Minister, Roberta Pinotti (Achijilen) aser US Secretary of Defense, Ashton Carter nati Rome yimti nung osangbener den ajurutepba noksa nung angur. (Rome, October 07)

Rome, October 07 (Agencies): Tang Syria aser Iraq na nung lendong kanga sashia atalokdaktsüba Islamic State (IS) kiralongrar telok anema raratsü maparen nung US-i aniba alima teloktep mitkartemi Russia den amalitepa inyaktsü mulunga maliba olen ka US Defence Secretary, Ashton Carter-i tanü Bodbar nü metetdaktsüogo.
“Russia-i Syria sorkar anemer anema raraba maparen manen tashi par mitkartem den amalitepa inyaktsü renema mali,” ta Italy Defense Minister, Roberta Pinotti den aroki osangbener den Rome nung tanü ajurutepdang Carter-i metetdaktsü.
Russia-i par mitkar tayimtsü Syria madak yimzüdaktsüba maparen den sentakba onük kar jembitepba dak alak, par lenirtem den külemi lungjemer IS anema raratsü sentong renemtsü tebilembabo mali ta pai nenshia ashi.
“Russia mitkartemi IS telok anema raratsü dak atemer, Syria Tir, Bashar al-Assad-i aniba sorkar anemertem amakba kuli tejangja bushiteta lir. Ajisüaka, par linüki yamaji inyakba ajanga Syria nung tensa tamajungba kümdaktsütsü ana nung lir. Anungji, ozü US densema alima teloktep mitkartemi par mitkartem den amalitepa inyaktsü memulunger,” ta Carter-i metetdaktsü.
Russia mitkartemi taoba Bodbar nü nungi tenzüka Syria sorkar anemertem amakba osang bushiteta lir.
Ajisüaka, Assad yimtsütsü menden nungi agienba ajanga dang Syria nung adokba mangatettep ken o bentettettsü ta bilemba West linüktemi Russia-i Assad aser pai aniba sorkar pusemba atema Russia aitsüogo.
Ano külen, US-i aniba alima teloktep mitkar aser Russia’er mitkartem na tsüngda memeteti tongpang rarabaren agientsü onük benoka jembitsü asoshi Russia-i yashi, Mongolbar nü benokba onük agizüka par lenirtem den Brussels yimti nung asüng, Brehostibar nü senden ka amentsü asoshi alima teloktep lenirtemi sentong renema lir.