IS dang nungi India jenbua mali: UAE Minister

Abu Dhabi, February 08 (Agencies): United Arab Emirates (UAE)-i India dang tekümdangsü osang ka metetdakja, kiralongrar telok Islamic State dang nungi nenok jenbua mali, ta shiogo.
Osang ajanga ashiba agi, UAE Minister of State for Foreign Affairs, Anwar Gargash-i, India-i ISIS amokmeren tulu ajurua lir, ta ashi.
Osangbener den jembidang Dr Gargash-i, “Iba ya ‘mapang talangka amokmeren’ ka lir, anungji asenoki amalitepa inyaktsüla aser khenyongi magizüktsüla. Iba nungi jenbua aliba tesem mali, asenoki iba amokmeren azüoktsü nüngdaker, shinga jenbua mali. Nenoki lendong nungi jenbua lir ta bilemra, nenok zübazülema alitsü aser nenok takoksa angutsü. Iba nungji India aser UAE densema ajak dena lir,” ta ashi.
Taruba hopta Abu Dhabi, Crown Prince, Sheikh Mohamed bin Zayed Al Nahyan-i India semdangtsü sentong lir.
Kasa osang ajangasa ashiba agi, tesüiba küm ka tsüngda ISIS den tesentaktep alir India nunger nisung 10 dak tema UAE nungi meyipa yokogo.
Pakistan-i kiralongrartem anema koma inyaker (?) ta asüngdangba langzüdang Gargash-i, “UAE-i kiralongraba anemba nung kümzüka aliba tesem mangur, non-government group mesüra sorkari senotsü agi yaria inyakba naprong ajanga jenbua aliba tesem mangur. Onoki ajakji jenjang kasa nung züngshir, kiralongrabaji kiralongraba,” ta ashi.
“Kiralongrar tajung mesüra kiralongrar tamajung ta kecha telemsa mali,” ta paisa ashi.
“Asenok ano taliba amalitepa inyaktsü nüngdaker. Iraq ama nungbo lenla ajaklen nungi inyaktsü nüngdaker. Asenoki, iba tesem ya kiralongraba ajanga kangshidar, ta tesem meshimtettsüla,” ta pai ashi.
Ato kilonser Narendra Modi-i yaküm August ita UAE semdanga liasü.
Tesüiba küm 3 tsüngda India nunger Ato kilonser kati UAE mezüng semdangsangji Modi lir.

You must be logged in to post a comment Login