IS den sentaktepba Kiralongrar 135 shi tepsetogo: Afghan mitkartem

Islamabad, June 27 (Agencies): Pakistan arrtsülen tentetba tesem nung kiralongrar mita arishitsü mitkar mapatong anogo ishika inyakdang Afghanistan mitkartemi tongti commander ishika densema, Islamic State (IS) kiralongrar telok den sentaktepa alir kiralongrar nisung 135 shi tepsetba aser parnok jenti yirutsüba osang ka Afghan mitkar lenirtemi tanü, Hombar nü metetdaktsüogo.
Afghan mitkartemi Nangarhar province kübok Kot district nung kiralongrar mita arishitsü mapatongji yashi, Deobar nü tashi inyak ta parnoki ashi.
Tan kiralongrar den raraba tongpang nung Afghan mitkartema nisung 12 shi asüba aser nisung 18 shi yiruba osang jangjaogo.
“IS teloki Kot meketa tentetba mitkar outpost ishika amakba sülen taoba Brehostibar nü nungi tenzüka, Afghan mitkartemi Kot aser temeket tesemtem nung atsüka alir kiralongrartem mita arishia parnok den tongpang raratsü tenzük,” ta Provincial Governor, Salim Kunduzi-i osang jangjashitsü.
Tan mitkar aser kiralongrar na tsüngda tongpang raraba ajanga nübur meyirijang jenti pei talidak toksür tanga tesemtem nung jenoka alitsüsa akümba osanga angazükogo.
Ano külen, par mitkartemi kiralongrar anema raraba ajanga IS teloki Afghanistan nung par tashiyim maparen bilema ama meinyaktetba osang ka Afghanistan nung tenzükba US mitkar otongdar, Brigadier General Charles Cleveland-ia tanü metetdaktsü.
“Yaküm, 2015 küm tashi nung Afghanistan nung IS kiralongrar züngsem 3000 shi aliba osang bushitet saka tan par telok anema tongpang raraba sülen par züngsem 1000 shi dang tang Afghanistan nung atsüka alir akümtsü akok,” ta pai shisem.