IS-i anünglen nungi New Delhi amaktsü akok

New Delhi/London, Nov. 28 (Agencies): Islamic State of Iraq and Syria (ISIS) telok densema kiralongrar telok balalai anünglen nungi New Delhi amaktsü akok, ta Ministry of Home Affairs-i metetdaktsü.
Kasa osang ajanga, item ama amakba nokdangtsü atema security agency temi nüngdakba mera ajak agiogo aser kiralongrartemi amaktsü südi, ta temulung melemi bilemba tongti tesem 15 asadangteta lir, ta ashi.
Ministry-i kiralongrartemi amaktsü mulung melemi bilemba tesemtem rongnung Ato kilonser ki, Home minister ki, tatong Tir ki, Rashtrapati Bhavan, Rajpath, India Gate aser CBI, CISF o BSF agency tem headquarters aliba CGO Complex densema lir.
Parnoki Unmanned Air System (UAS), nisung madenba tayimtsü aser Para motors tem amshitsü akok, ta ministry-i ashi.
Iba anema mera agia Security Agency tem dang, “Mulung malemtsüsa mesüra mejangjaba tayimtsütemji India Air Force (IAF)-i ‘non-friendly’ ta sangdongba mapang nungjisa kahzüktsüla,” ta tuyuogo.
“India nung yimti tulutem rongnung Delhi ya ‘most sensitive’ lir. Telok balala nungi amokmeren angur. Saka tangbo anünglen nungi amakbaji tongtibangtiba. Delhi nung yamaji amaktsü akok ta security aser intelligence agency temi osang agütsüogo. Iba amokmeren nokdangtsü atema sorkari sentong ka asameyangdar,” ta sorkar tongti ketdangser kati ashi.
Taoba ita Delhi airport nung mulung malemtsüsa nisung madenba tayimtsü ka ngua liasü, ajisüaka tang tashi security agency temi ibaji mejangjateter.