IS-i Assyria nunger Khristanpur 37 tashi chiokogo: SOHR

Beirut, November 07 (Agencies): Iraq aser Syria na nung lendong kanga sashia atalokdaktsüba Islamic State (IS) kiralongrar teloki Assyria nunger Khristanpur 37 tashi chiokba osang ka nübur temeten asoshi nokdakba tongti telok kati tanü Honibar nü metetdaktsüogo.
“Tan chioker tantsür tambur nisung 37-ji IS teloki taküm February ita Syria nungi tashiyim agi pua anir aoba nisung 212 rong nung densemba osang jangjaogo,” ta Britain nung tentetba Syrian Observatory for Human Rights (SOHR) teloki osang jangjashitsü.
Arab kin balala nung lenirtemi IS telok den mepishiba sülen par teloki tan nisung 37-ji chiokba osanga jangaogo ta SOHR-i ashi.
Tan chiokertemji Tel Tamer jila tonga anir aoba aser parnok ajunga indang taküm tia junga aliba osang ka Assyrian Human Rights Network (AHRN)-ia metetdaktsüogo.
Tan nisung 37 chiokba ya densema, IS teloki pua ayur nisung 212 rong nungi ajak agi nisung 88 tashi chiokba osang jangjaogo.
Ano, tanüngba nisung 124-jia chioktsü asoshi telok balalai IS den maneni jembiba osanga jangjaogo.