IS-i Baghdad nung nisung 62 shi poksetdaktsü

Baghdad, August 13 (Agencies): Islamic State (IS) ta ajaba kiralongrar teloki truck gari nung alenokba bomb tesashi ka Baghdad yimti kübok tentetba shishilembadak tanü Brehostibar nü pokdakja lendong tulu atalokdaktsüogo ta police-i metetdaktsü.

Baghdad yimti kübok Sadr City kiyong nung tentetba Jameela shishilembadak atalokdaktsüba bomb lendong nung ishiba agi nisung 62 shi poksetba osang tang tashi nung jangjaogo ta parnoki ashi.

“Tanü lendong nung nisung 62 poksetba den külemi, nisung 125 shi yiruba osang jangjaogo,” ta parnoki metetdaktsü.

IS teloki tanü lendong atalokdaktsüba atema tenüng agia metetdaktsüba den külemi, tarutsü mapang nunga tan amala lendong maneni atalokdaktsütsü amokmerenba olen ka metetdaktsüogo.

Tanü pokshiba lendong atalokba ajanga nisung pokseta yirutsüba den külemi, shishilembadak tentetba ki o jen ajunga kanga mejungi poksatsüba osanga jangjaogo.

“Tanü, Brehostibar anogo ya shishilembatsü tongti anogo ka lir kechiyong anameta tentetba province balala nung alirtemi nungdakba chiyongtsü alizüktsü asoshi hopta shia Brehostibar nü shishilembadaki kanga lungsoa arur,” ta police ketdangser kati metetdaktsü.

Paisa ashiba agi, tanü pokshiba oset alenoka yutsüba truck gariji refrigeration truck ka asüba yong iba gariji shishilembadaki osettsüset bener aruba gari ta ajaki bilema liasü.

Baghdad aser temeket tesemtem nung tanü amala lendong balala anogoshi ama atalokdaktsür saka ita ishika tsüngda nung tanü lendong nung nisung timba asüba osang bushitetogo.

Tang Iraq lushi shilem 4 nung shilem 3 tashi tashiyim agi agia aliba IS teloki taoba July ita nunga Iraq anüdoklen, Diyala province nung pokshiba lendong tesashi ka atalokdakja nisung 115 dak tema tepsetba osang bushiteta lir.