IS-i Dhaka nung nisung 20 tepsetba rongnung India tsür ka dena liasü

Dhaka amakba sülen Assam aser Tripura kümkümshir

New Delhi/Guwahati/Agartala, July 02 (Agencies): Hokolbar ayaterm nungi tenzüka Honibarnü tashi IS kiralongrartemi Bangladesh yimtiba, Dhaka nung aliba restaurant ka agir amakdang nisung 20 asür rongnung India tsür ka densema liasü; iba mapang nungsa kiralongrartema trok tepset aser ka apu.
UC Berkeley nung azünger kaketshir, Tarushi Jain ji Dhaka nung sodi munga liasü. Tesüiba küm 15-20 tashi tebui Bangladesh nung süoshi shishilembaba mapa inyaka arur, ta ketdangsertemi ashi.
Ano India nunger doctor kata iba lendong nungi tera agi dang jenbuteta liasü. Pai Bengali oshi junga jembitetba ajanga kiralongrartem jagi pa Bangladesh nunger ta bilem, ta parnokisa ashi.
Iba dak sentakba nung twitter ajanga External Affairs Minister, Sushma Swaraj-i, “Dhaka nung kiralongrartemi amakdang India tsür ka tenüng agi Tarushi tepset ta ni tejashi nung lemsateper,” ta metetdaktsü.
Laisa, “Ni tebu, Sanjeev Jain den jembiogo aser asüko osang lemsatepogo. Iba ama mangyim mapang nung linük nüburtem lar kibong den lir. Par kibong atema onoki visa renemtsüdar. Ozü ketdangsertemi iba mapaji inyakdar,” ta ashi.
IS kiralongrartemi restaurant amakdang Italy nunger ti densema nisung metsü taochi makai tepset, iba sülen ang commando temi kiralongrar trok tepset aser ka apu.
Iba osang angashia Ato kilonser, Narendra Modi-i Bangladesh Ato kilonser, Sheikh Hasina dang, iba ama mangyim mapang ka nung India linük nenok den lir, ta ashi.
Modi-i, “Dhaka amakbaji o agibo merasateti onok jashir. Iba ama mangyim mapang ka nung Bangladesh nunger adianu aser aianutsürtem den India dena lir. Asür kibongtem atema ni sarasademtsür. Yirua alirtem tekaraba nung ajungtsü ni sarasademtsür,” ta ashi.
IS kiralongrartemi Dhaka amakba sülen Honibarnü Assam Police additional director general of police (special branch), Pallab Bhattacharya-i, “Onoki amokmeren tia indang tejangja meshitettsü, ajisüaka Dhaka tatalokba sülen onoki kümküma alitsü metetdaktsüogo. State nung onoki Jamaat-ul Mujahideen Bangladesh modules aika puaka ano maneni parnok lir,” ta ashi.
Ano Dhaka tatalokba sülen Tripura nunga tongtibang tesemtem aser lokti longsoa aliba tesem aika nung security akhangshiogo.
Tanü Agartala nung Director General of Police, K Nagraj-i, state ketdangsertemi iba tensa reprangshia tongtibang tesemtem nung sepai tali toktsüogo, iba den külemi India-Bangladesh arrtsü kilometer 856 nung sepaitem kümküma alitsü atema BSF dang shiogo, ta metetdaktsü.
Bangladesh Prime Minister Sheikh Hasina-i tanü osangbenertem den jembidang, Islamic kiralongrartemi Islam tenüng menüktsür ta ashi.
“Kiralongraba nung teyari agütsürtem dang, nenoki kechiba tai maket nisungtem taküm agir? ta ni asüngdanger. Islam ya yimjung indang tamangba yimsü ka lir, nenoki yimsü tenüng menüktsür” ta Hasina-i metetdaktsü.
Laisa anogo ananü ‘national mourning’ alitsü osang metetdaktsü.
“Ramzan mapang nisung tepsetba Muslim nungertemji komala nisungtem? Nübortemi item nisungtem anema noktaktsüla. Ozü sorkari Bangladesh nung kiralongraba tera nungi atsüteta endoktsü” ta laisa metetdaktsü.