IS-i India amaktsü asameyangdar

New Delhi, July 8 (Agencies): Taoba Hokolbarnü Islamic State of Iraq and the Levant (ISIS) kiralongrartemi Bangladesh yimtiba, Dhaka amakba sülen maneni parnoki India amaktsü sentong asameyanga maongka bushidar, ta Intelligence osang ka ajanga metetdaktsü.
Bangladesh nung ISIS tashi itta amenokba ya India atema shisabulu tulu ka lir.
ISIS kiralongrartem indang phone call ka lazükba nungji kiralongrar kati, “Bangladesh nung tashi itta amenokba ajanga ISIS-i India maktettsü,” ta jembia lir.
Intelligence osang ajangasa, Bangladesh nung amenoka aliba kiralongrar telok, Jamaat-ul-Mujahideen Bangladesh (JMB)-i West Bengal aser Assam na nung kiralongraba tentet amenokogo.
JMB-isa item state nungi teshimtet tesem kar nungi züngsem tasentem shimokdar. ISIS den tesentaktep alitsü südi ta mulung melemi tang tashi nung West Bengal nung nisung pezü pua lir.
Intelligence osang ajangasa ashiba agi, JMB den densemba nisungtem aser Jamaat-e-Islami student wing ya Bangladesh nung Islamist yimtenren party tuluba lir, aser parnokji ISIS den sentaktepa lir.
Social media ajanga ‘radicalisation’ prokshiba ya alima sorkartem atema tebilemtsü tulu ka kümogo. Dhaka nung Gulshan cafe amaker kiralongrar tenet rongnung parnok timbaka tesüiba ita aika Bangladesh nung samar alirtem liasü.