IS-i Jakarta nung lendong agütsü; nisung 7 asü 20 shi yiru

IS-i lendong agütsüba sülen tangokba noksa nung tasümang kar merepshia aliba aser Indonesia police tem prangpong amer gari tiplen kanga kümküma aliba angur. Jakarta, Jan. 14, 2016.

Jakarta, January 14 (Agencies): Tanü Brihostibar nü Islamic State (IS) ta ajaba kiralongrar telok tetsüti nung züngsemer telok kati Indonesia yimtiba, Jakarta nung lendong kanga agütsüogo.
Alima ajunga nung Muslim nunger timba alidak, Jakarta nung aliba Starbucks café aser departmental store tejentiba, Sarinah’s na nung tanü nisung tenet-i pei temang nung alenokba bomb pokdaktsüba den külemi injang yoka lendong agütsüba osang jangjaogo.
Tanü lendong nung amaker nisung pongu densema ajak agi nisung tenet asüba osang tang tashi nung jangjaogo.
“Tanü lendong nung Indonesia nunger ka aser Canada senso ka asüba aser Algeria, Austria, Germany aser Netherlands nunger kaka densema ajak agi nisung 20 shi yiruba osang tang tashi nung jangjaogo,” ta Indonesia National Police otongdar, Anton Charliyan-i osang jangjashitsü.
“Indonesia nung tentetba caliphate sepaitemi Jakarta yimti nung tanü lendong tulu atalokdaktsüogo,” ta shia, IS telokia tanü lendong atalokdaktsüba atema tenüng agiogo.
“Tanü amakertemi tapoktsü lendong trok shi atalokdaktsü,” ta shia, Indonesia nunger kiralongrar, Bahrun Naim-i tongti shilem agia tanü lendongji atalokdaktsü ta temulung melemi bilemba olen ka Jakarta police lenisang, Tito Karnavian-ia metetdaktsü.
Naim ya tang IS teloki Syria nung tesepti tentetba yimtiba, Raqqa nung atsüka aliba osang bushiteta lir.
Karnavian-isa ashiba agi, tanü amaker kati Starbucks café telungi ia pa temang nung alenokba bomb pokdakja nisung ishika yirutsüba sülen kimalen ataba kiralongrar anati café telung nunga kimaleni jena adokertem dak injang kalokja amak.
“Kasa mapang nung kiralongrar anati grenade bomb pokdakja anasa aliba police traffic post amakba osang jangjaogo,” ta pai shisem.
Islamist kiralongrartemi taoba mapang nunga Indonesia nung lendong aiben atalokdaktsüogo lir saka kiralongrartemi tan mezüngsüa telok tenteta amakba lendong agütsüogo.
Indonesia police ketdangsertemia IS den sentaktepa alir ta temulung melemi bilemba nisung 20 shi pua aliba osang jangjaogo.
“Asen linük aser nüburtemi metsübutsü ajungshir. Asenok kiralongrartem nem kodanga mekokdaktsütsü anungji, nübur ajungai süngjema alitsü mepishir,” ta Indonesia Tir, Joko Widodo-ia lendong atalokba sülen sangoktsü.
“Tanü lendong nung nisung asüba atema sasar aser nübur rongnung tetsübo tensa bener arutsüba maparen kanga sashia aitsür,” ta pai shisem.