IS-i Mosul nüburtem jung ama amshir: UN

Geneva, October 28 (Agencies): Iraq kübok Mosul yimti nung alima teloktep mitkartemi nungitba Iraq mitkartem den tongpang raraba Islamic State (IS) kiralongrartemi Mosul nung alir nüburtem jung ama amshiba osang ka United Nations-i tanü, Hokolbar nü sangoktsüogo.
Sunni kin nisungtemi tentetba IS teloki par ozüng mangar taoba Iraq mitkar züngsem 190 aser nübur 42 densema, ishiba agi nisung 232 shi tan Bodbar nü tepseta osang bushitetba olen ka UN Human Rights otongar, Ravina Shamdasani-ia metetdaktsü.
“Iraq mitkartemi tan October ita 17 nü nungi tenzüka, IS ket nungi Mosul yimti tanaben agishitsü mitkar mapatong tenzükba sülen IS teloki Mosul temeket nung alir nüburtem tashiyim agi anidena, parnok Mosul yimti nung lidaktsütsü tenzükba osang bushitetogo,” ta lai ashi.
Alima teloktep mitkar aser Iraq mitkartemi par telok anema tongpang raratsüren nung tetsüdaktsü ajurudaktsütsü nükjidong nung IS teloki jung ama amshitsü nükjidong nung Mosul nung tai maketba nüburtemji anidenba osang jangjaogo.
Laisa ashiba agi, tetsür aser tila tanurtem densema, IS teloki tanü tashi nung Mosul yimti temeketlen sub-district balala nung alir kibong 8,000 shi Mosul yimti nung tashiyim agi lidaktsüba osang bushiteta lir.
Ano külen, Mosul nung alir telok kari taoba mapang IS telok pusemertem bushia, parnok tepseta mang ayangba osang angazükba sülen UN High Commissioner for Human Rights, Zeid Ra’ad al-Hussein-i tebilemtsü khuret benokba osang ka Shamdasani-isa metetdaktsü.
“Taküm lia apuba IS züngsemtem aser par telok pusema yarirtem den ozüngi melaba ama inyaktsüla. Alima ozüngi melaba ama, parnok den sentakba ken o okadak angadanga, parnok aibelenba kuli bushiteta parnok aitsüra, ozüngi melaba ama parnok nem tapet temerenshitsü agütsütsü,” ta lai shisem.