IS-i sentong asameyangtsü aser LeT-i India amaktsü

New Delhi, June 08 (Agencies): Alima nung kiralongrar telok tesashiba, Islamic State (IS)-i India amaktsü kanga merangdangogo ajisüaka tamakok angu, aser tangbo parnoki sentong melenshia India amaktsü atema tesem nung aliba Lashkar-e-Toiba (LeT) ama kiralongrar teloktem den senteper inyaker.
Bodhbarnü Deccan Chronicle osang ajanga ashiba agi, Intelligence Bureau nem tekümdangtsü osang ka metetdaktsüogo. Iba osang nung, “ISIS-i India makner, aser iba atemaji parnoki LeT den yaritepa inyaktsü meranger,” ta shia lir.
Kasa osang nung, “IS-i sentong asameyangtsü aser parnok ketdangsüba kübok tang India nung kiralongrar telok, LeT-i amaktsü,” ta shia lir.
“Iba ama asalendong tulu agi amakba ajanga ISIS-i India nung parnok aliba metetdaktsütsü, kechiyong amakba tenüngji parnoki agitsü aser ibaji ajanga parnok den adentsü atema lanurtem ajungmesotsü,” ta kasa osang nung shia lir.
Video ka nung India nungi IS züngsemtemi linük nung kiralongratsü amokmerenba sülen anogo ishika tsüngda iba osang temai adoker.