IS-i South Korea nung US nunger amenoka aliba osang temai adoka metetdaktsü

Seoul, June 19 (Agencies) : Islamic State (IS) telungpur teloki US military South Korea nung amenoka aliba temai adoka metetdaktsüogo aser parnoki item tesemtem amaktsü tebilemba lir, ta Deobarnü Seoul intelligence services ajanga sangdongogo.
Gyeonggi aser North Jeolla province tem nung US nunger tayimtsü anenba tesemtem ajak Islamic State kiralongrartemi tuteta shiogo. Iba den külemi parnokisa South Korea nunger senso kar indang osang tejangja online osang ka ajanga temai adoka metetdaktsü, ta National Intelligence Service (NIS)-i sangdong ka ajanga metetdaktsü.
Parnoki item osangtem ya parnok den inyaker ‘hackers’ tem ajanga ngutetba lir, ta NIS sangdong nungsa shia lir. Kasa online osang ajanga parnoki US nunger amenoka aliba tesemtem amaktsü ajungshiba indang osanga metet, ta EFE osang ajanga metetdaktsü.
Intelligence agency-isa ashiba agi, South Korea ketdangsertemi linük sepai aser US military na den lokteper linük kümzüka ayutsü asoshi akokba tashi nüngdakba mera ajak agiogo.
South Korea-i US den tesentaktep ayuba ajanga linük rangben lendongi aitsü, ta IS teloki South Korea amokmerenogo.
South Korea Army-i tang ita ishika kiralongra mapa anema nokdangtsü atema kanga tashi itshiogo aser tesüiba küm pongu tsüngda nung parnok kiralongrartem den sentaktepa aliba bendanger nisung 50 shi pei pei limai meyipa yokogo.
Ano South Korea nunger ana kiralongrar telok nung adentsü merangba ajanga parnoka pua yua lir.