IS-i tai maketba nüburtem tekong tangja tepsetba maparen aitsür: Ghani

Kabul, November 09 (Agencies): Islamic State (IS) ta ajaba kiralongrar teloki tai maketba nüburtem Afghanistan anülulentip tsütsülen tepsetba maparen aitsüba olen ka Afghanistan Tir, Ashraf Ghani-i tanü Hombar nü kanga jashia metetdaktsüogo.

Afghanistan anülulentiptsütsü Zabul province kübok Khake-e-Afghan district nung IS teloki tetsür 3 densema tai maketba nübur nisung 7 tashi tekong tangja tepsetba osang ka Zabul province police ketdangsertemi yashi Deobar nü metetdaktsü.

“Tai maketba nüburtem, talisa tila tanur aser tetsürtem tekong tangja tepsetba atema IS telok kanga sashia aitsür. Iba ama ozüng alema inyakba ya Afghanistan ajunga anema inyaker ta züngshir,” ta Ghani-i tanü metetdaktsü.

Tan amala ozüng alema tai maketba nisungtem tepsetertem pua parnok nem ozüngi melaba ama tapet teremenshitsü agütsütsü asoshi tongti senden ka amentsü ayongba den külemi, kasa tatalokbaji kanga junga bushisüngdangtsü asoshi Ghani-i par ketdangsertem tuyuogo.

IS teloki kidangsüa aliba Ghazni province nungi ita ka tejaklen tashiyim agi pua ayuba sülen Shi’ite Hazara kin nung züngsemba nisungtemi tan tepseta merenshir lir ta Afghan ketdangsertemia metetdaktsüogo.

Afghanistan aser Iraq na indang lushi tulubaka tashiyim agi agia aliba IS teloki Afghanistan anüdoklen tsütsü, Pakistan arrtsülen, Nangarhar province nung densemba district ishika nung tesep tenteta Afghanistan nunga kiralongratsü maparen kanga sashia inyak tenzükba osang bushiteta lir.

Ketdangsertemisa ashiba agi, tawa Zabul province nung Taliban telok ana tsüngda tongpang kanga sashia raraba ajanga ishiba agi nisung 50 shi asüba aser nisung 10 dak tema yiruba osanga jangjaogo.

Tongti Taliban commander ishikati tongti Taliban telok toktsür külen par lenisang menden abentsü asoshi Mullah Mohammad Rasool shimer anogo ishika süir külen tan lendongji atalok ta parnoki shisem.

Tan Taliban telok tasen tentetertemi taoba Taliban lenisang, Mullah Mohammad Omar küm 2 dak tema tejaklen asüba osang alima dang sangoktsüba sülen lenisütsü menden abensang, Mullah Akhtar Mansoor anemba osang bushiteta lir.