IS-i tepseter yutsüba tasümang 89 angu

Baghdad, January 21 (Agencies) : Honibarnü Iraq nung ketdangsertemi IS telungpuri tepseta yutsür aoba tasümang 89 nguteta lir. Ketdangsertemi item tasümang ya Speicher Camp (Tikrit Air Academy) nung aliba sepaitem asütsü amai bilemer aser parnok ya 2014 küm IS teloki Tikrit amanglemba mapang tepsetba lir, ta province security sangdong ajanga metetdaktsü.
Security, forensic aser Iraq High Commission of Human Rights (IHCHR) teloktemi item tasümang aliba tesem, tesüiba mapang Tikrit Tir ki nung adenshi aser shisaa orr aliba tasümangtem kanga junga aremtsü atema kakteta bener ao, ta osangbenertemi ashi.
Security force temi pua aliba IS züngsem kar dang asüngdangya asüba mapang parnoki tepseta yutsüba osang temai adoka ashi, ta osang ajangasa ashi.
Parnok tasürtemji Baghdad nungi kilometre 170 shi pilar aliba sepia tayimtsü anenba tesem, Camp Speicher nungi adoker sepai 1,700 rong nung liasü. Parnok ya IS den Sunni telungpur kari pua bener orr tepset.
June 2014 nung IS-i aniba Sunni telungpuri aoksaa Iraq security force amaktsü tenzük dang sorkar sepaitemi parnok aliba tesem aser raradang amshiba oset yutsür jena aoba sülen telungpurtemi linük anüdoklentip aser anüolentip tesemtem nung tesem tuluka amanglem.
Iba sülenji IS teloki Iraq sepaitem tepsetba video aser noksatem social media ajanga prokshi.
April 2015 nung Iraq security force temi IS ket nungi Tikrit meyipa agiba sülen sepai sobutsü sobur, sepai ID semer süa aliba tasümang aika forensic teloki kaktetogo.