New Delhi, January 21 (Agencies): Bodhbarnü Delhi Police-i kiralongrar telok Islamic State (ISIS) züngsem pezü (arishi küm 19-23 tsüngdapur) apuba osang sangdonga liasü, aser parnoki Syria aser Iraq nung IS den tongtepratepa Republic Day atongtsü lia Haridwar nung Ardh Kumbh, Delhi NCR malls- Select Citywalk, Saket; DLF Promenade, Vasant Kunj aser Noida nung Great India Place amaktsü sentong renema liasü.
IS züngsemtem apuba ajanga India nung tang mezüng ISIS aliba jangjaogo.
Police-i ashiba agi, kar tetuyuba nung ISIS cell züngsemtemji IEDs bomb renemtsü aser raraba osettem alizüktsü liasü, aser parnokji VOIP, WhatsApp aser Facebook ajanga tongtepratepa liasü.
TOI osang ajanga, ISIS züngsem asem apuba osang metetdaktsüba sülen tang Delhi police-ia iba osang jangjashitsüogo. Delhi police special cell-i IS züngsem pezübuba apuba osang sangdongogo. Paji Bodhbar anepongi 1:00 ako meta apu.
Parnokji West Asia nung ISIS den tongtepratepba kuli nguogo.
Tang pua alir IS züngsem rongnung, Rooke tesem nung aliba polytechnic college nung kümsembuba engineering kaketshir, Akhlaq ur Rehman tatidang agütsütsü atema college–i aoba mapang apu, local college ka nung BA azünger Mohammed Osama aser Ajiz na aser Ayurvedic medicine nung bachelor kaketshir Mehraj nunger liasü.
February 8 nü Haridwar nung Ardh Kumbh amaktsü sentong aliba dak alia ISIS züngsemtem jagi anogoshia nisung aikati semdangba shishilembaba tesemtem amaktsü sentong liasü.
Par pezüji Facebook, WhatApp aser Hike ajanga ISIS nung shimokertem den tongtepratepa liasü. Parnok ajakji anogo 15 nü police ket nung ayutsü aser Intelligence Bureau aser special cell na sentper parnok dag asüngdangyadagi.
Maneni parnokji Chhattisgarh, Madhya Pradesh aser Uttar Pradesh-i anir oa parnoki IS züngsemtem ajurutsü aliba tesemtemi anir aotsü.
Mezüngbubaren asüngdangyaba mapang parnoki talisa Ardh Kumbh nung bomb pokdakja nisung timtiba südaktsütsü sentong aliba indang ashi.
Republic Day matongdangyongi parnoki IED renemtsü aser raraba oset alizüktsü maparen tatembanglen ka liasü ta parnoki shiogo, ta police osang ajangasa ashi.
You must be logged in to post a comment Login