IS kiralongrar aputsü asoshi senpet sen mn 14 agütsütsü: Turkey

Ankara, April 06 (Agencies): Tawa Turkey nung lendong kanga sashia atalokdaktsür Islamic State (IS) kiralongrartem apur mesüra parnok aputsüsa osang tejangja agütsürtem nem senpet sen dollar sen million 14 agütsütsü asoshi Turkey sorkari sangdongogo.
Turkey Interior Ministry-i tan tasenba küma yanglushiba sülen aputsü asoshi renemba IS kiralongrar tarensen nung tetsür 3 densema, kiralongrar tenüng 23 tashi densemba osang jangjaogo.
Tan renemba kiralongrar tarensen nung densemba kiralongrar 3-bo Syria anüdoklen Kurd kini tentetba People’s Protection Units (YPG) teloki tang pua alitsü akok ta ministry-i temulung malemba olen ka metetdaktsüogo.
Turkey mitkaremi taoba hopta tsüngda nung Turkey anülulentip tsütsü, Izmir province nung kiralongrar mittsü sentong ishika agiba sülen IS kiralongrar 5 tashi pua liasü.
Ano, yashi, Mongolbar nüa Turkey mitkartemi IS züngsem ta temulung malemba nisung 5 tashi Syria arrtsülen, Gaziantep province nung apuba osang angazükogo.
IS telok tenüng nung raradaktsütsü nükjidong nung Izmir nung alirtem IS telok nung anioker, ‘Sari Murat’ mesüra ‘Yellow Murat’ ta ajar nisung ka tawa apuba osang ka Izmir police-ia metetdaktsüogo.
Turkey senso 2000 shi IS telok tenüng nung raraba osang bushitetba den külemi, IS den sentaktepa alir nisung 800 dak tema yaküm, 2015 küm apuba osanga ministry-i metetdakja liasü.