IS kiralongrartemi Egypt police ketdangser 13 tepset

Sinai, March 20 (Agencies): Islamic State (IS) ta ajaba kiralongrar telok tetsüti züngsem kari Egypt kübok Sinai Peninsula nung tentetba police checkpoint ka tanü, Deobar nü amakba osang ka Egypt’er Interior Ministry-i metetdaktsüogo.
“IS teloki North Sinai state provincial capital, El-Arish nung tentetba checkpoint nung mortar tapoktsü oset ka kalokja amakba ajanga tajemba agi police ketdangser 13 tashi tepsetba osang tang tashi nung jangjaogo,” ta Ministry-i osang jangjashitsü.
Tanü lendong atalokdakja police ketdangsertem tepsetba maparenji par teloki inyak ta IS telokia tenüng agia metetdaktsüogo.
El-Arish nungsa Egypt police ketdangser 5 shi taküm January ita tepsetba atema IS teloki tenüng agia liasü.
Egypt nüburtemi Cairo nung sorkar anema longkak kanga sashia aita, Egypt-i democracy yimsüsütsü yimya benshia shimba mezüngbuba Tir, Mohammed Morsi Tir menden nungi tashiyim agi atsüngdokba sülen 2013 küm nungi tenzüka Sinai nung tan amala kiralongrar aser telungpur den sentakba lendong kanga sashia atalokba osang bushiteta lir.