IS samatsütsü asoshi Russia-i sepai 1,50,000 Syria-i yoktsü

Moscow, October 04 (Agencies): Kiralongrar telok, Islamic State khenyongi samatsütsü asoshi Russia Tir, Vladimir Putin-i par sepai 1,50,000 tashi Syria linüki yoktsü atema renemdar, ta osang ka ajanga metetdaktsü.
Russia lenir-i IS telok junga amenoka aliba yimti, Raqqa azüoktsü atema sepai jenti yoktsü, ta kasa osang ajanga ashi.
Raqqa yimti ya Syria nung ISIS yimtiba lir ta sangdongogo aser IS züngsem 5,000-i iba yimti nükdar.
Telung osang ka ajanga, “Russia-i iba linük anüdoklen makdokner, aser ibaji tejangja, iba den külemi parnoki Raqqa aser Palmyra temeket nung aliba totzü aser gas ajunga azüokner,” ta ashi.
Tesüiba ghonda 24 tsüngda Russia nunger jet tayimtsütem nungi bunker poktoktsüba air bomb, BETAB-500 amshia ISIS post tuku makdokogo. Maneni Russia nunger sepaitemi ISIS telok samatsütsü akok.
Russian Defence Ministry otongdar, Igor Konashenkov-i, “Tesüiba ghonda 24 tsüngda Sukhoi Su-34 aser Su-24M fighter jets ajanga Islamic State post tuku samatsüogo,” ta ashi.
Paisa, “International linüktemi dang mulungtetra iba state (IS) samatsütsü ya ghonda ishika dang agitsü,” ta ashi.
UK Ato kilonser David Cameron-ia Russia nungeri tayimtsü nungi IS amakba pela agizükogo, iba den külemi Putin’er operation ji UK-i kanga junga repranga atatsü, ta shiogo.
UK lenir Cameron-isa, Iraq aser Syria nung IS kiralongrartem amaktsü atema UK-i ano Protector drone tasen 20 alitsü, ta sangdongogo.