IS telok anemba Colouring Book tasen ka US nung adokogo

Chicago, November 12 (Agencies): Islamist kiralongrar teloktemi tenzükba Jihad mapatong anemtsü nükjidong nung US nung kaket menünga adokba telok kati Islamic State (IS) anemba colouring kaket tasen ka adoktsüogo.

‘ISIS: A Culture of Evil’ ta ajaba kaket nung IS teloki tashiyim inyakba noksa aser kiralongrar telok balalai pei telok nung züngsemdaktsütsü asoshi adokba kakettem anemba noksatem menüngoka lir.

“Tan adokba kaket ya ozü teloki menünga adokba kaket rong nung tongtiba lir. Kecha memimbangi ochi tatalokbatem indang noksa densemba kaket adoktsü asoshi nüburtemi mapang talang ka nungi ajungshiba aruba sülen ozü teloki tan kaket ya adokogo,” ta Really Big Coloring Books nung Chief Executive Officer, Wayne Bell-i metetdaktsü.

“‘Iba kaket ya tanurem atema masü’ ta tan adokba kaket tejaklen temetettsü o züluja lir saka tsürapurtemi tesayutsü hadir ka ama iba kaket ya pei chirnurtem den lemsatepa amshitsü imlar,” ta pai ashi.

Pei jangraba sentsü balala anütsü asoshi renemba kaket nung IS teloki nisung jenti ken nung tepsetba, süng amshia tai maketba nisungtem reshikangshiba, tetsürtem tejak nung acid shilokja merenshiba noksatem aser ‘IS temzüng raksang aser nenok asütsü’ amala ozülu balala menüngoka lir.

Ajisüaka, Really Big Coloring Books teloki US kübok St. Louis nung tan menünga adokba kaket ya nüburtem atema tapet kaket ka masü ta mitkar mongitemi metetdakja kasaji anemtsü tenzüka lir.