IS telok makdoktsü maparen tenzükogo: Ahmet Davutoglu

Ankara, July 24 (Agencies): Islamic State (IS) ta ajaba kiralongrar telok tetsüti aser PKK ta ajaba Kurd kin züngsemtemi tentetba telungpur telok makdoktsüba maparen Turkey mitkartemi tenzükba osang ka Turkey Ato Kilonser, Ahmet Davutoglu-i tanü Hokolbar nü metetdaktsüogo.

Turkey police ketdangser 5000 dak temai tanep anepongi tenzüka par linük kübok densemba province 13 tashi mita senzüba sülen bendanger 37 densema kiralongrar ta temulung malemba nisung 297 tashi apuba osang ka pai tanü metetdaktsü.

“IS aser PKK telok na Turkey ajunga nungi meshimeshia memakdoktet tashi ozü mitkar aser police ketdangsertemi tan tenzükba maparen ya inyaktsü,” ta Davutoglu-i tanü osangbener den ajurutepdang ashi.

Turkey mitkartemi par F-16 fighter jet tayimtsütem amshia Syria nung tentetba IS tesep asem tashi tanep amakba osanga pai metetdaktsü.

Ajisüaka, par mitkartemi arrtsü adena Syria lushi telungibo ia IS telok anema meraradaktsüi lir ta pai shisem.

IS telungpurtemi Syria aser Turkey arrtsülen Turkey mitkar ka tepseta lendong atalokdaktsür anogo ka süir külen, Turkey-i tanü nungi tenzüka kiralongrartem mita parnok anema raratsü tenzüker lir.

IS teloki Turkey southeast tsütsü arrtsülen tentetba jila ka nunga bomb lendong atalokdakja nisung 32 shi tepseta tawa lendong kanga sashia atalokdaktsüba osanga bushiteta lir.