IS teloki Baghdad nung bomb pokdaktsü; 24 shi pokset

Baghdad, May 30 (Agencies): Islamic State (IS) kiralongrar teloki Iraq yimtiba, Baghdad aser Baghdad temeket nung bomb lendong ishika tanü, Hombar nü atalokdaktsüba osang ka sorkar ketdangsertemi metetdaktsüogo.
“Tan lendong nung nisung 24 shi poksetba osang tang tashi nung jangjaogo,” ta parnoki ashi.
Iraq mitkartemi IS ket nungi Fallujah yimti tanaben agishitsü mapatong tenzükba mapang ka nung IS teloki tan lendongji atalokdaktsür lir.
Iraq mitkartemi taoba hopta nungi tenzüka IS ket nungi Fallujah yimti tanaben agishitsü mitkar mapatong tenzüka lir aser IS teloki tan lendongji atalokdakja, Iraq mitkartemi tongpang raradak tongpang sadema meraradaktsütsü tasa amshir lir.
Tanü lendong tesashitiba atalokdak, Shitte nisungtem jenti aliba Shaab kiyong nung peisasa pokseta asütsütsü mulungteter kati pokshiba oset alenokba car ka anir oa mitkar checkpoint ka nung bomb lendongji atalokdaktsü.
Iba lendong nung nübur 8 aser mitkar 3 densema, parnok 11 tashi pokset aser nisung 14 shi yirutsü.
Peisasa pokseta asütsü mulungteter tanga kati pokshiba oset alenokba car gari ka amshia, Baghdad yimti nungi kilometer 50 shi pilar, Tarmiyah jila nunga lendong atalokdaktsü ajanga nübur 7 aser police ketdangser 3 densema, parnok 10 poksetba aser nisung 24 shi yiruba osang tang tashi nung jangjaogo.
Baghdad anüdoklen, Shiite Sadr City district nunga motorcycle nung alenokba bomb pokdaktsüba sülen nisung 3 poksetba aser nisung 10 yiruba osang ka police-i metetdaktsüogo.
Tan amala lendong atalokba osangtem osangbener den lemsateptsü temela agüja maliba yong parnok tenüng memetetdaktsütsü nangzüktepba sülen ang sorkar aser police ketdangsertemi tan lendong atalokba osangji metetdakja liasü.