IS teloki Bangladesh mosque ka amak; 1 asü, 3 yiru

Bangladesh kübok Bogra district nung tentetba Shi’ite mosque ka yasüng, Brehostibar aonung amakdang yirutsür ka mozükidangi anir aotsü asoshi gari ka nung aniokba noksa ka yangi angur. (Dhaka, November 27)

 Dhaka, November 27 (Agencies): Islamic State (IS) kiralongrar teloki Bangladesh anüdoklentip tsütsülen tentetba Shi’ite mosque ka yasüng, Brehostibar aonung amakba osang ka Bangladesh sorkar ketdangsertemi tanü Hokolbar nü metetdaktsüogo.

Tongpang nung amshitsü prangpong abenba IS teloki Bogra district nung tentetba mosque kilungi iya idakji sarasadema alir Shi’ite nisungtem dak injang kalokja amakba sülen jena ao ta US nung tenetba SITE Intelligence Group-i tanü osang jangjashitsü.

“Yasüng amakertemi nisung 4 tashi yirutsü aser parnokji mozüki bushia anir aodang nisung ka len tom nung asü,” ta Bogra police Addition Superintendent, Arifur Rahman Mondal-ia metetdaktsü.

Tan lendong nung asüsangji arishi küm 70 tain Moazzem Hossain aliba osang jangjaogo aser pa tan amakba mosque ketdangser ka liasü ta Mondal-i ashi.

Paisa ashiba agi, tan lendong atalokdaktsür pua parnok ozüngi melaba ama merenshitsü asoshi Bangladesh linük ajunga nung bushitsü tenzükogo.

Shi’ite nungertemisa taoba October ita tamangba yimsü den sentakba yimdong süa jajaba sentong ka agidang bomb ka pokdakja lendong atalokdaktsüba densema, Shi’ite nisung timba aliba Muslim linük, Bangladesh nung ita ishika tsüngda nung tan agi tanabuba lendong atalokdaktsür lir.

“Shitakba Islam tamangba yimsü benshir kati kiralongratsüren meinyaker. Tan tekülem kidang lendong atalokdaktsürtem dang muslim nunger ka mejatettsü. Tan lendong atalokdaktsürtemi tamangba yimsü dak atemer tai maketba nisungtem tepseta Islam nem nüngmenok bener arutsür,” ta Bangladesh Ato Kilonser, Sheikh Hasina-ia tanü metetdaktsü.

IS telokia tan lendong atalokdaktsüba atema tenüng agia metetdaktsüogo.