IS teloki Beirut nung bomb lendong atalokdaktsü; 44 shi pokset

Lebanon yimtiba, Beirut kübok Burj al-Barajneh kiyong nung bomb lendong tesashi ana tashi yasüng, Brehostibar aonung atalokba sülen nüburtem lendong atalokdak nokdaktepa aliba noksa nung angur. (Beirut, November 13)

Beirut, November 13 (Agencies): Islamic State (IS) kiralongrar teloki Lebanon yimtiba, Beirut nung bomb lendong ana tashi yasüng, Brehostibar aonung atalokdaktsüba osang ka sorkar ketdangsertemi tanü Hokolbar nü metetdaktsüogo.

“Shiite kini tentetba Hezbollah teloki tesep tentetba Burj al-Barajneh kiyong nung yasüng bomb lendong tesashi 2 tashi atalokba osang jangjaogo. Kasa lendong nung ishiba agi nisung 44 poksetba aser nisung 200 shi yiruba osang tang tashi nung jangjaogo,” ta Lebanon Health Minister, Wael Abou Faour-i osang jangjashitsü.

“Caliphate mitkartemi pei taküm tenla yasüng lendongji atalokdaktsüogo,” ta shia, IS teloki yasüng lendong atalokdaktsüba atema online ajanga tenüng agia metetdaktsüogo.

Ajisüaka, IS teloki lendong atalokdaktsüba osangji tang tashi mejangjateti lir.

“Peisasa pokseta asütsü mulungteter kiralongrar anati pei temang nung alenokba bomb pokdakja yasüng lendongji atalokdaktsüba osang jangjaogo. Ano, pei temang nung alenokba bomb mepoki aliba kiralongrar tasümang ka lendong atalokdak anguba osanga jangjaogo,” ta mitkar ketdangsertemia metetdaktsü.

Ano külen, tan lendong atalokba den sentakba onük benoka jembitsü nükjidong nung Lebanon Ato Kilonser, Tamman Salam-i ayonger külen par security cabinet aser mitkar lenirtem den tanü rongdak senden ka amenba osanga jangjaogo.

Iran sorkari nungitba Hezbollah teloki par züngsemtem arrtsü adena kidangsüa aliba Syria linüki yoka IS densema, Syria Tir, Bashar al-Assad aser pai aniba sorkar anemertem anema raradaktsüba atema kepzüktsü nükjidong nung tan lendong ya atalokdaktsü südi ta mitkar lenirtemisa temulung malemba olen ka metetdaktsü.

Lebanon nung tentetba yimtenren telok rong nung mangatettep ken o adokba ajanga sorkar tashi meiti küma taoba ita 17 tejaklen nungi tenzüka Lebanon nung Tir meshimteti tensa mejungi aliba osanga bushiteta lir.