IS teloki Iraq nung 12 tepset, 15 shi yirutsü

Baghadad, May 13 (Agencies): Tongpang nung amshitsü prangpong abener telok kati Iraq yimtiba, Baghdad anüdoklentip tsütsülen tentetba jila ka nung lendong tesashi ka atalokdaktsüba osang ka police-i tanü, Hokolbar nü metetdaktsüogo.
“Prangpong abener nisung 3-i Shiite nisung jenti alidak, Balad jila nung tentetba chiyongtsü ayokdak ka yasüng ayaterem nung amakba osang jangjaogo.  Yasüng lendong atalokdaktsüba osang angazükba sülen police ketdangsertem lendong atalokdak tonga ao aser idangji amaker anati pei temang nung alenokba bomb pokdakja lendong maneni atalokdaktsü,” ta police-i ashi.
Baghdad nungi anüdoklentip tsütsüleni kilometer 80 shi pilar Balad jila nung atalokba lendong nung ishiba agi nisung 12 asüba aser nisung 15 shi yiruba osang tang tashi nung jangjaba osang ka parnokisa shisem.
Ajisüaka, osangbener den iba amala lendong atalokba osang lemsateptsü temelaba agüja maliba yong parnok tenüng memetetdaktsütsü nangzüktepba sülen ang police-i tan lendong atalokba osangji metetdakja liasü.
Baghdad yimti nung anogo 2 tashi pokshiba lendong atalokdakja, ishiba agi nisung 80 shi tepseta lendong atalokba sülen tan lendongji ataloker lir.
Ano külen, tanü lendongji par züngsemtemi atalokdaktsü ta shia, Iraq aser Syria na nung lendong kanga sashia atalokdaktsüba kiralongrar telok, Islamic State (IS)-i tan lendong ataloktsüba atema tenüng agia metetdaktsüogo.