IS teloki Iraq nung 30 shi tepset

Baghdad, July 22 (Agencies): Islamic State (IS) ta ajaba kiralongrar teloki Baghdad aser Diyala province na nung bomb lendong ishika atalokdaktsüba ajanga ishiba agi nisung 30 shi tanü Bodbar nü poksetba osang jangjaogo ta police-i metetdaktsü.

Tanü lendong tesashitibaji Baghdad anüdoklen, al-Jadida district nung tentetba shishilembadak atalok ta parnoki ashi.

“IS teloki car gari nung yutsüba bomb shishilembadak pokdaktsüba ajanga ishiba agi nisung 19 poksetba aser nisung 43 shi yiruba osang tang tashi nung jangjaogo,” ta police colonel kati osang jangjashitsü.

Baghdad anülulentip tsütsü, Zafaraniya kiyong nunga car gari nung yutsüba bomb pokdakja lendong atalokdaktsüba sülen nisung 4 poksetba aser nisung 10 shi yiruba osang jangjaogo ta pai ashi.

Baghdad anüdoklentip tsütsü Tarmiya jila nung police aser mitkar nati lokteper tentetba checkpoint ka nunga car gari nung yutsüba bomb ka tanü pokdakja police aser mitkar ketdangser 3 poksetba aser parnok 9 shi yiruba osang jangjaogo ta police-i metetdaktsü.

Baghdad anüdoklen tsütsü, Diyala province nungsa densemba Mandali jila nunga car gari nung yutsüba bomb pokdaktsüba ajanga nisung 4 tashi asüba osang jangjaogo ta parnoki ashi.

Tanü lendong ajungaji par züngsemtemi atalokdaktsü ta shia, IS teloki tanü lendong atalokdaktsüba atema tenüng agia metetdakja liasü.

IS teloki June, 2014 nungi tenzüka tashiyim agi agiba Iraq lushi rong nung Diyala province ya densema liasü saka Iraq mitkartemi Diyala province IS ket nungi tanaben agiogo ta Baghdad sorkari taküm January ita nungtu sangokja lir.

Aji oda, IS teloki Diyala province nung tesep tenteta meliaka, par züngsemtemi tanü amala bomb lendong balala Diyala province nung mapang shia atalokdaktsüba osang bushiteta lir.