IS teloki maneni Iraq nung lendong agütsür

Cairo, May 15 (Agencies) : Islamic States (IS) teloki Iraq nung taküm bendanga agüja apokba tapoktsütem amshia amakba manener.
UN Assistance Mission ajanga ashiba agi, Iraq nungsa lendong tatalokba lir, iba linük nung aliba jila aser yimti aika molumi amai kümogo.
UN Assistance Mission-i tawa asadangba osang ajanga ashiba agi, taoba ita kija nung Iraq nung kiralongrar temi nisung 1,119  tepsetogo aser nisung 1,561 yirutsüogo
Ibala mesükba lendong ya May ita nunga maneni atalokdar aser taoba hopta-a taküm bendanga agüja tapoktsü pokloktsürtemi nisung aika taküm samatsüa yirutsüogo. Item lendong ya timba ka Iraq anüdoklentip aser anülulen tsütsü 2014 June ita nungi ataloka arur, ta Xinhua news agency osang ajanga metetdaktsü.
Anbar western province, Iraq nung Honibarnüa taküm bendanga agüja tapoktsü apokertemi police pongu tepset aser 14 yirutsüogo.
Taoba Hokolbarnü prangpong amer nisung asem gari nung arur Balad anüdoklentip, Iraq nung restaurant tila ka amakdang nisung 13 asü aser 25 yiru.
Ano taoba Bodhbarnüa Baghdad nung item kiralongrartem yagi gari nung tapoktsü yur pokdaktsüba mapang tajemba agi nisung 96 asü aser nisung 171 yirutsü.
Kasa anogo nungsa Shia dirtrict kübok Sadr yimti nung IS telungpur kati pa mena aliba gari nung tapoktsü ka pokdakja tajemba agi nisung 64 tepset aser nisung 87 yirutsü.
Iba lendong ataloker gondha ishika dang lir külen ano Shia district, Kadhmiyah nung taküm bendanga agütsür tapoktsü pokdaktsür kati tapoktsü sünga aliba gari ka pokdaktsü dang nisung 17 pokset aser 43 yiru.
Kasa mapang nung ano Baghdad anülulen tsütsü gari nung aliba tapoktsü ka poka nisung 12 asü aser 31 yiru.
Item lendong atalokba sülen linük Ato Kilonser Haider al-Abadi-i rongdak bushisüngdang asütsü tetuyuba agütsü.
Yimti temi item kiralongrar aita lendong agütsüba nokdangtsü asoshi sepaitemi kanga yakyaka mita atatsü, ta pai ashi.
Brihostibarnü UAE-ia IS telokpuri nisung taküm samatsüba tatalokbatem aitsüogo.
Iba ama tensa nung onoka Iraq den dena lir, ta UAE-i shiba WAM osang ajanga metetdaktsü.
IS teloki agir aliba Iraq nung yimti tulutiba rongnung tanabuba, Mosul yimti taküm küm tatemlenbosa tanaben meyipa agitsü atema linük sepaitemi Iraq anülulen aser anüdoklentip tsütsü kanga meranga raradar.