IS teloki pua aliba Croatia senso tekong tangja tepsetogo

Cairo, August 12 (Agencies): Egypt nung tentetba Islamic State (IS) ta ajaba kiralongrar teloki pua aliba Croatia senso ka tekong tangja tepsetba video ka tanü Bodbar nü alima dang internet ajanga sayuba osang ka jangjaogo.

Tanur 2 tebu, arishi küm 30 tain Tomislav Salopek tekong tangja tepsetba sülen pa tasümang anasa kokari ka aser IS telok indang wako tanak ka yutsüba noksa ka IS teloki tanü internet ajanga alima dang sayua liasü.

“Par Croatia linüki ozü telok anema tongpang raraba atema onoki pua alisang, Salopek tekong tangja tepsetogo,” ta par teloki metetdaktsü.

Salopek chioktsü melena Egypt sorkari par tepuokdak puoka alir tetsür IS züngsemtem taoba Hokolbar nü tashi nung chioktsü takhangba ka IS teloki benok saka Egypt sorkari par takhangba onükji magizüki oda mapangji süidaktsü.

Ano, Egypt-i kiralongrar anema rarabaren nung Croatia-i Egypt nungitsü osang sangdongba aser Croatia sorkari Kurdistan region nung alirtem pusemba osang adoktsüba Egypt nung adokba osang kaket ka tasümang anasaji yutsüba osanga jangjaogo.

Ajisüaka, Egypt foreign ministry aser Cairo nung tentetba Croatian Embassy ketdangsertemi Salopek tepsetba den sentakba osang ka danga tang tashi melemsatepi lir.

Tang Syria aser kidangsüa aliba Iraq na indang lushi shilem 4 nung shilem 3 tashi tashiyim agi agia aliba telok, IS-i yaküm 2014 küm August ita nung America nunger osangbener, James Foley-a tepsetba osang bushitetogo.