IS teloki Saudi tepuokdak poksatsütsü amokmerener

Riyadh, January 06 (Agencies): Syria aser Iraq na nung tesep tenteta alima tesem balala nung lendong tsüdong tesashi atalokdaktsüba kiralongrar telok tetsüti, Islamic State (IS) teloki jihadist-tem puoka ayuba Saudi Arabia’er tepuokdak ajunga poksatsütsü amokmerenba osang ka sangoktsüogo.
Saudi sorkari al Qaeda telungpur 43 densema ozüng alema inyaker nisung 47 tashi taoba hopta tepseta merenshiba sülen IS teloki tan iba amokmerenba osang ya sangoktsür lir.
Saudi aser kidangsüa aliba Yemen linük na nung tawa lendong kanga sashia atalokdaktsütsü tenzükba IS teloki tanga tepuokdak den külemi, al Qaeda aser IS pusemertem puoka alidak, al-Ha’ir aser Tarfiya tepuokdaktem poksatsütsü metetdaktsüogo.
“IS teloki tepuokdak puoka alir ajunga anitettsü alizüng yua lir. Ajisüaka, ozü telok züngsem aser ozü telok pusemertem chioktsü asoshi memulungra, parnok puoka ayuba tepuodak ajunga poksatsüba ajanga tepuokdak puoka alirtemji kümzük anitettsü,” ta par teloki sangoktsü.
Yaküm July ita nunga IS telok pusemer kati pa temang nung alenokba bomb pokdakja Riyadh anasa, Ha’ir tepuokdak kimalen lendong atalokdakja liasü.
IS aser al Qaeda telok na ya alizüng balala ayuba telok süaka, telok anaprongla ya Saudi Arabia anemba telok lir kechiyong Saudi sorkari telok anaprongla indang züngsemtem aser par telok pusemer nisung meyirijang jenti tepuokdak puoka merenshir.
Riyadh-i taoba Honibar nütu Muslim tamangba yimsü lenir, Nimr al-Nimr densema Shiite Muslim nisung 4 tepseta merenshiba sülen Iran dena tesendaktep mejungi kümogo.
IS teloki 2014 küm November ita nungi tenzüka tanü tashi nung Saudi Arabia nung lendong balala atalokdaktsüba ajanga Shiite nisung timba densema nübur 50 dak tema aser mitkar züngsemtema nisung 15 dak tema tepsetba osang bushiteta lir.
Ano külen, Al Qaeda in the Arabian Peninsula (AQAP) telokia par züngsemtem tepseta merenshira, parnoki Saudi mitkartem indang azü tokshitsütsü ta yaküm December ita amokmerena lir.
AQAP ya taoba mapang, 2003-06 tashi Saudi Arabia sorkar anema raraba al Qaeda telungpur mongintemi Yemen nung tentetba kiralongrar telok ka lir.