IS teloki Syria nung kiralongraba maparen aitsür: Russia

Moscow, February 22 (Agencies): Alima ajunga nung kiralongrar telok tetsüti, Islamic State (IS) teloki tawa Syria nung bomb ishika pokdakja lendong atalokdaktsüba maparen aitsüba olen ka Russia-i tanü Hombar nü metetdaktsüogo.

“Syria nung yimji yimjung lidaktsütsü asoshi tenzükba yimjung maparen nem tamakok ngudaktsütsü nükjidong nung tan Syria nung lendongji atalokdaktsüogo,” ta shia, alima ajungai Islamic State (IS) kiralongrar telok nem tapet telangzüba agtsütsü tajungshiba olen ka Russia foreign ministry-i tanü metetdaktsü.

Syria kübok Damascus yimti nung bomb lendong ishika yashi, Deobar nü atalokba ajanga ishiba agi nisung 83 shi poksetba aser Homs nunga pokshiba lendong atalokdaktsüba sülen tanü tashi nung nisung 59 shi asüba osang bushiteta lir.

Ano külen, Russia aser United States nati aroki lungjemer Syria sorkar anemertemi Syria Tir, Bashar al-Assad-i aniba Syria sorkar den yimjung tezüngzüktep agitsü ajungshitsü maparen tenzükogo.

US Secretary of State, John Kerry aser Russia Foreign Minister, Sergei Lavrov nati telephone ajanga jembia Syria sorkar aser sorkar anemer na tsüngda yimjung tezüngzüktep agidaktsütsü obang ajemba osanga angazükogo.

“Assad pusemer, Russia-i Syria sorkar o Iran lenirtem na den ajuruteptsü aser ozü US-i Syria sorkar anemer den ajurutepa Syria nung adokba mangatettepbaren bentettsü nükjidong nung sorkar o sorkar anemer nati yimjung tezüngzüktep agitsü ajungshitsü sentong renema lir,” ta Kerry-i metetdaktsü.

Yashi Damascus nung lendong atalokdaktsüba maparenji United Nations (UN)’er Syria envoy, Staffan de Mistura-ia kanga sashia aitsüogo.

Syria sorkar aser sorkar anemer na tsüngda yimjung tezüngzüktep agidaktsütsü asoshi tan hopta maneni senden amentsü renemba osang ka Mistura-i tan February ita tetenzüklen metetdakja liasü saka yimjung sendenji takok ngua mementettsüsa akümba olen ka pai taoba Hokolbar nü metetdaktsüogo.

Syria sorkaria sorkar anemertem den yimjung tezüngzüktep agitsü mulunga aliba olen ka Tir Assad-ia metetdakja lir.