IS teloki Syria nung nisung 120 dak tema poksetdaktsü: SOHR

Syria kübok Tartous yimti nung tentetba bus station ka anasa pokshiba lendong atalokba sülen Syria mitkar aser nüburtem lendong atalokdak sentepa aliba noksa ka yangi angur. (Tartous, May 23)

Beirut, May 23 (Agencies): Syria sorkari agia aliba yimti ana tashi nung pokshiba lendong tesashi tanü, Hombar nü atalokdaktsüba osang ka Britain nung tesep tentetba nübur temeten asoshi nokdakba telok, Syrian Observatory for Human Rights (SOHR)-i metetdaktsüogo.
“Syria tzüyimkümlen tentetba Jableh aser Tartous yimti na nung tanü lendong atalokba sülen tang tashi nung nisung 120 dak tema poksetba aser nisung 100 shi yiruba osang jangjaogo. Tan lendong nung nisung asüba aser yiruba osangji tang dang nungi timba akümtsü akok,” ta SOHR-i metetaktsü.
“Syria Tir, Bashar al-Assad densemba Alawite kin nüburtem tepsettsü nükjidong nung tan lendongji atalokdaktsüogo,” ta shia, Islamic State (IS) ta ajaba kiralongrar teloki tanü lendong atalokdaktsüba atema tenüng agia metetdaktsü.
Syria sorkar pusemba Russia’er tzüyim mitkartemi tesep tentetdak, Tartous aser Russia-isa par mitkar tayimtsü tesep tentetba Jableh yimti na nung peisasa pokseta asütsü mulungteter IS züngsemtemi pei temang aser car gari nung alenokba bomb pokdakja tanü lendongji atalokdaktsüba osang jangjaogo.
Jableh yimti nung lendongji mozüki aser bus station na anasa atalokdaktsü aser Tartous yimti nunga bus station ka anasa, nübur lungsoa alidak atalokdaktsüba osang ka SOHR-isa metetdaktsü.
Alima tashi abenba linük lenirtemi Syria nung mangatettep adoka tongpang raraba teloktem rong nung yimjung tezüngzüktep agia, par mangatettepbaren agiena yimjung alitsü ajungshiba mapang ka nung tan lendong ya ataloker lir.
“IS amala kiralongrartemi mitkartem den tongpang raradak tongpang raratsü melena, tai maketba nüburtem aliba tesemtem nung pokshitsü lendong atalokdaktsüba ya labi mapa ka lir aser kasaji kanga sashia aitsür,” ta Syria’er Information Minister, Omran al-Zoubi-ia metetdaktsüogo.