IS teloki tila tanurtem nem kiralongratsü terenemshiba agütsür

Irbil, March 23 (Agencies): Islamic State (IS) ta ajaba kiralongrar telok tetsüti-i par telok nung Iraq aser Syria tila tanurtem tashiyim agi anioksema parnok nem kiralongratsü terenemshibaren agütsüba osang ka Iraqi Kurdish Peshmerga sepai lenirtemi metetdaktsüogo.

“IS teloki Mosul nung tentetba terenemshidak balala nung arishi küm 8 tain densemba tila tanurtem nem peisasa pokseta asütsütsü, itangitsü aser tongpang raratsü terenemshibaren agütsüba osang bushiteta lir,” ta Makhmour frontline nung IS telok anema rarar Peshmerga sepai commander, General Sirwan Barzani-i osang jangjashitsü.

Par sepaitemi arishi küm 15 tain IS züngsem ka tawa apuba sülen IS teloki tila tanurtem nem kiralongratsü terenemshibaren agütsüba osangji jangjashi ta pai shisem.

IS densema, Jabhat al-Nursa aser Syria sorkar anemer Free Syrain Army nungeri tila tanurtem anioksema parnok nem tongpang raratsü terenemshibaren agütsüba osang bushitetba osang ka London nung tentetba kiralongrar anema rarabaren research agir tentet, Quilliam-ia metetdaktsüogo.

Par tentetisa ashiba agi, tila tanurtem nem tamasa Islam tamangba yimsü tesayuba agütsüba sülen ang parnok nem tongpang raratsü aser kiralongratsü terenemshibarenji agütsüba osang bushiteta lir.

IS teloki yaküm, 2015 küm kisüng nung Mosul aser anasa densemba tesemtem nung alir arishi küm 9 nungi 15 tain tetsüngda tanur 900 shi tashiyim agi pua Mosul anülulentiptsütsülen tentetba teseptemi anir ao idakji parnok nem kiralongratsü terenemshibaren agütsüba osang bushitetba osang ka United Nations (UN)-ia tawa metetdaktsüogo.

Tila tanurtem rong nung tanüburtem tamangba yimsü tesayudaki yokba sülen arishi küm 10 ser tema tain tebur chanutem nem kiralongratsü terenemshibaren agütsüba osang bushitetogo ta UN-isa metetdaktsü.