Isak asüba ajanga yimjung ken o tetsükdaktsü madoktsü: Zeliang

Kohima, July 14 (TYO): Tanü Nagaland Chief Minister, T R Zeliang-i, NSCN (IM) Mendenbuba, Isak Chishi Swu asüba ajanga tang Centre aser NSCN(IM) na tsüngda yimjung ken o jembiba nung tetsükdaktsü madoktsü, ta ashi.
Anogo ananü State Assembly tembangba sülen osangbenertem den jembidang Zeliang-i, “Swu asüba ajanga onok jashir, ajisüaka pa asüba sülena ken o maneni jembitsü, parnok (NSCN (IM) aser Centre) taruba anogo ana-asem tsüngda ano ken o jembitsü aser iba nungji tetsükdaktsü malitsü,” ta metetdaktsü.
“Pa asüba ajanga onok jashir aser pai menden tazüng toktsüba atsüngtsüji tasak asütsü, ajisüaka nisung karibo mendenbuba mendenji melenzüktsüla aser ken o jembiba nung tetsükdaktsü malitsü,” ta paisa ashi.
CM-isa, Naga yimtenren ken o nung Nagaland Legislators Forum ka ama kobi melii Parliamentary Working Committee-i Naga yimtenren onük atema Ato kilonser ajurutsü asoshi Delhi-i aotsü, ta ashi.
CM, TR Zeliang-i onük balala nungi jembiba osangtem tatsü nung:
DDA: Tawa state nung ano Disturbed Area Act (DDA) ita 6 atsülangshiba dak sentakba nung CM-i, State Cabinet-i Union Home Ministry aser Ato kilonser dang, tang state tensa kanga tesünep nung lir anungji iba Act agientsü atema shidi ka zülutsü lemtetogo, ta metetdaktsü.
NEDA: North East Democratic Alliance (NEDA) tentetba dak sentakba nung CM-i, iba ya North Eastern Region tejakleni aotsü atema mera tasen ka lir, ta ashi.
Tatar Senden: Tatar senden tatsüka dang agiba atema nüburtemi aitsüba dak sentakba nung CM-i, Assembly mesüra Parliament nung question hour aser sorkar bill tem agizükdang mapang kanga endoker, ajisüaka tia kar Nagaland nungbo opposition mali aser senden tesünep nung agiteter, ta ashi.
Municipal Elections: Naga Mothers Association (NMA)-i Municipal election nung tetsür nem shilem 33% wazüka yutsütsü akhangba dak sentakba nung Zeliang-i, NMA-i court-i ogo aser vote agütsütsü temeten den shilem 25% wazüka yutsütsü magizüker, ta ashi. Paisa, Supreme Court nung tetsürtem reservation ken o benoka liaka sorkari elections agitsü bilemdar, aser ibaji taruba cabinet senden nung süoka jembitsü, ta metetdaktsü.
Tai tongloktsüba: Health & Family Welfare, Social Security & Welfare, Education ama department balala nung ochimashi lir ta tai tongloktsüba dak sentakba tasüngdangba ka langzüdang Chief Minister-i, department kar anema nisung kari court nung ken otem benokogo aser court-i obendang magütsü tashibo sorkari item ken o nung telemtetba kecha magitettsü, ta ashi.
Food Security Act: State nung National Food Security Act mapatong nung nüburtemi yariteptsü mepishia CM-i, iba ya ajanga nüngdakbapurtem indangindanga tajangzük angutsü, ta ashi. Tang iba Act ya Kohima aser Dimapur na nung dang benoka lir, ajisüaka taruba ita tanüngba district tekuprongla nunga benoktsü, ta paisa metetdaktsü.
Gari Lenmang: State nung Highway project balala dak sentakba nung CM-i, court-i sorkar dang Maytas-Gayatri indang DPR tasenba agizüktsü tuyuogo aser SARDP projects reprangtsü atema sorkari Commissioner ka shimogo, ta metetdaktsü.
NH-29 fourlane yanglutsü atema local contractor tem nem mapa agütsütsü akhangba dak sentakba nung Zeliang-i, contract mapa atema local contractor shinga temsüa maliasü, aser Union MoRTH-i item projects ya mapa tilala küma lemsaogo, anungji NH-29 yanglutsü project ji tangalen company tem nem agütsü, ta ashi.
Itasen Menoba: Central scheme kübok aliba RMSA aser SSA nem itasen menoa magütsüba dak sentakba nung Zeliang-i, Centre-i mapang shitak nung central schemes atema sen melemzüktsüra mapang shitak nung itasen magütsütettsü, ta ashi.
Backdoor Appoinment: Backdoor appointments ji Contract Appointments lir ta shia CM-i, June 6 nü cabinet-i contract appointment atema jembiogo aser iba anogo nungisa iba ya khenyongi nokdangtsü lemtet, ta metetdaktsü. Paisa, June 6 matongdang appoint asürtemji tamalen ama service nung küm asem abensaba sülen regularized sütsütsü, ta shisem.