Isak Chishi Swu-i Naga nungertem ayongzüker

Dimapur, September 30 (TYO): Asen lipok otsü nung kanga dang tongtibang lenjem ka nung asenok noktaka lir aser tarutsü atema telemtetba tajung ka agitsü asoshi tanü mapang aruogo, ta Isak Chishi Swu, Chairman, NSCN/GPRN-i Bodbarnü sangdong ka nung metetdaktsü.
Tsüngremi asenok asoshi iba alima nung shilem ka lemzükja lir ta asenoki meteta lir aser amanger. Anungji asenoki joko aibelen mesüli mesüra terata nung alitsü memerangli. Tesüiba nung asenoki aibelena inyakba aser tangari asen dak tim mesüi inyakbatem asenoki metongshitsü merangdi, ta Isak Chishi Swu-isa shia lir.
Prangpong-injang amer rara tenzükba nungi tanü asenok yimten mapa inyaktsüsa mapang tonga aruogo. Asenoki Naga yimten tebilemtsü atema meranga inyakba ajanga tangari asen lipok otsü aser taginüba akhümtsübur aser agizükogo. Prangpong amer raraba agi yimten olemtep melenzük aser July 11, 2002 nü asen lipok otsü aser tensa khenyongi balaka ta agizükba sülen nungi yimten telemtetba takang ka agitsü atema olemtep liyonga arur, ta paisa shia lir.
Isak Swu-isa ashiba agi, asen Naga nunger lipok otsü khenyongi balaka ta agizükba nung ajemdaker August 3, 2015 nü India sorkar den “Framework Agreement” nangzüktep aser iba nung telok anaprongi yimjung nung külemi liyonga otettsü asoshi shisaobang ka dangi arutsü atema inyakteptsü tenangzükba agi. Ano, kati ka akhümtsübutsü aser alima loktiyimten tangatetba nung telok anaprongi pei sasa yimsü süa alitsübaji nübortemi dang lemtettsü ta tangatettep kati aruogo.
Naga nungeri lipok otsü aser yimten temeten hau ta magizüki lemsar dang lira telemtetba kecha mongutettsü. Naga nunger taginübaji tesüiba mapang 16 point Agreement aser 1975 Shillong Accord amala tenangzükba agiba ama dang meyipzüka angatetra asen sasa tamakok ajurutsü kechiyong item tenangzükba ajanga asenok ashioktsüogo, ta paisa sangdong nung shia lir.
Tsüngremi mapang tajung moatsüdang asenoki tai telemtetba magitsü merangdi. Ni aser kü medemer Thuingaleng Muivah na den nüjiso atema noktaker aikati tetenzük nungi 1951 plebiscite nung ammeter inyaktsü telemtetba agi aser Nagaland ya Yisu atema ta nangzükba nungi masetshi noktaktsü atema onoki telemtetba agiogo, ta NSCN/GPRN Chairman-isa ashi.
Tanü asen lipok otsü nung temelenshi angutsü mapang ka nung Naga nunger ajak dang tesüiba toktsütsü aser ajak Khrista tenüng nung ka küma longjemer tarutsü atema telemtetba tajung agitsü ayongzüker. Kechisarena atema mapang lir, anungji asenok yimten tsütsü aibelena alibatem metongshitsüla aser tarutsü atema külemi inyaktsüla, ta paisa ayongzük
“Ni temang manemba agi tanü ni nenok den arua medenteter saka asenok ajak külemi longjemer tejakleni aotsü atema ni nenok ayongzüker. Asenoki yimjung aser azükarua alitsü asoshi telemtetba tajung ka agitsü atema Tsüngremi asenok nem shisatsü moajang ta ni sarasademer” ta Isak Chishi Swu-isa sangdong nung shia lir.