ISBT atema NST aser MDPBA tsüngda tenangzüktep agiogo

Dimapur, July 22 (TYO) : July 21, 2015 nü Inter-State Bus Terminus (ISBT) tenzüka aotsü atema Nagaland State Transport Department aser Mokokchung District Private Bus Owners Association (MDPBA) tsüngda memorandum of understanding (MOU) ka agiogo aser iba nung kuliserji District Administration, Mokokchung liasü.
Iba tenangzüktep ya July 27, 2015 nungi mapa küma tenzüktsü aser MoU nung shia aliba agi Alichen-Dmr dak alaka MDPBA aser NST na indang counter ajak ISBT (Yimyu) nung dang lapoktsü.
NST aser MDPBA tsüngda MoU: Senzüsenbongertemi ISBT nung dang bus nung amentsü aser NST o Private bus ajak ISBT nungi dang apuso. ISBT complex nung NST kibur ka ama MDPBA nungi meinprong kecha melii inyaksangshitsü.
ISBT nung mapa tenzükba sülen ita 20 tashi NST-i MDPBA nem lemzüktsüba takdang aser tanga teyari agütsüba atema taa kecha magitsü. Iba dakji alaka MDPBA-i ki aser taktangtem anepaluba atema sen endokba menoktsü aser ano parnokisa metsümeshidak reprangba den parnok taktang nung atsükba electricity bill menoktsü.
ISBT complex nung ozüng anema mapa inyakba mesüra inyakertem melidaktsütsü atema MDPBA-i azüoktsü aser MDPBA-i tenangzüktep agiba nung aibelenra NST-i kibur ama tapet mapa inyaktsü.
ISBRT complex mezüngbuba menden nung aliba counter 9, Enquiry room, Passenger toilet aser Parking bays nungertem DPBA-i acha-ayangtsü aser passenger waiting hall o retiring room na külemi lemsateptsü.
Ita 20 tembangba sülen NST department-i MDPBA nem lemzüktsüba atema taa reprangshimtsü aser nüngdak dang süra, MDPBA o district administration na den asüngdangya asütsü.
ISBT nung telongtet nung kiojen mesüra temporary structure kecha meyanglutsü. Nüngdak adokra mezüng NST department dang nungi temelaba meshitsüla. ISBT dak sendakba maparenji NST, MDPBA Regional Transport Authority aser District Administration nungertem nungi teshimtet telok kati reprangtsü.
Aonung 6:00 ako matongdang bus ajak apusotsüla.
Iba dak sendakba nung Mokokchung DC-i tanga sangdong ka ajanga jila nung night service bus indang ticket mayoktsü tetuyuba agütsüogo.
Mokokchung jila nung Sumo counter ajaki iba tetuyuba sülen anidaktsü tuyur, ta Mokokchung DC-isa metetdaktsüogo.