Ishinbai teimba akoker

Tang Karnataka state nung tatar menden 222 atema election agiba sülen tatar züngsem teimba aliba Congress aser JD(S) telongjem toktsür parnok dang nungi tatar züngsem ishinba aliba BJP telok nem government akümtsü maongka agütsübaji Karnataka Angh, Vajubhai Vala-i yimten nung kanga ambangyima inyakogo ta angatetter. Atangji, election sülen yimten telok katia government akümtsüsa menden peria mengutet ser atsütepba mapangbo yimten telok kobai tatar menden teimba ngua lir, iba telok nem tama government akümtsüba maongka agütsübaji shitak asütsü. Ajisüaka, tang Karnataka nung atalokba otsü yabo balaka, kechiyong yimten telok rongnung BJP teloki menden teimba ngutetaka, parnok kisüngi government akümtsüsa nübo peria mali saka ano külen Congress aser JD(S) telok na longjemerbo tatar züngsem 117 jungadoker. Karnataka government akümtsü asoshi tatar züngsem 112 dang nüngdaker asünungji Congress aser JD(S) telok nem government akümtsü maongka agütsütsübaji tim dang liasü. Ajisüaka, Independent züngsem ka dena BJP telok nung tatar züngsem ajak agi 105 dang lir. Tetezü BJP teloki government akümtsü asoshi tatar züngsem ano tenet nüngdaker. Iba ama yimten jenjang ka nung Angh-i BJP teloki akümba government nung Chief minister B.S.Yeddyurappa nem pa den nübo peria sayutsü asoshi anogo 15 tsüngda tatar senden jazüktsü mapang agüja lir. Iba anogo 15 tsüngdangji Yeddyurappai yimten ain ka amshia tatar züngsem ajak agi 222 nungi nübo teimba sayutettsü teimla nung governor-i nüngsen ajak tizükteta maongka agütsü südi. Nübo ishiba süaka BJP telok nem government akümtsü asoshi maongka agütsüba ya tang mezüng masü. Yaküm 2017 küm Manipur nunga Congress teloki tatar menden 28 aser BJP teloki 21 angu saka idangjia BJP nem government akümtsü tama maongka agütsü, Meghalaya nunga Congress teloki 21 aser NPP aser BJP telok telongjemi  menden 19 angu, saka idangjia BJP den aliba NPP nem government akümtsü maongka agütsü. Iba amaji tang center nung BJP teloki yimsü asüba mapang ya jakdaka temzüng ozüng tsütsü atsünga masü saka yimten telok jak repranga inyakba angur. Koba lima nung südir süang yimten telok kati dangbo teti yimsü masür aser masütsü. Mapang mapang shia yimten teloka melentsü aser nisunga melentsü ta yimten yimliji aotsü. Anungji shir yimsüsüba tendak südir süang, pei mulungba agi masü saka temzüng ozüngi melaba nung telemtetba agüja mapa shitak inyaka yimsü asütsüla. Nisung kar yimsü asüba mapangbo linük temzüng ozüng ajak ajembanga yur pei sünütsüsa inyaker. Idangji, government nem sentsüh tulu tsütsür aser tarutsü lima yanglutsü melen raksaa yutsür aor. Aji oda, koba yimten telok südir süang ozüng yanglurtemi tama ozüng raksaa apusora parnok takokji khen atema dang asütsü. Government akümtsü nübo peria mali ser government akümba nungji tim masüba mapa inyaktsüsa adoktsü, kechiyong nübo abensatsü atema tangar telok nung aliba tatartemji mesüzüktsüsa akümer. Itemji kechi agi mesüzüktsüar temetet dang lir. Iba mapangji governori agütsüogo. Iba ama mapang nung tatartem aika rongsen aser yimten nung jenjang tajung nükshidang tatidang nung tsükadoktsü. Iba ama atsütepa aser mesüzüktepa inyakba mapa ajungaji nübortem meyong rongsen endoka inyaker asünungji takoksabo nübortem takoksa asütsü. India nung BJP telok ya yimten nung tain telok ka lir, anungji nübo mabensayonga government kümnüba agi linük nung temzüng ozünga mali ama inyakra, India yanglur masü teraksatsür asütsü. Linük aser nübor meimba yimsüsürji takoknü pelatepba ya masü saka makoknü takoksa arema temzüng ozüng kübok ochishia aliba agi metettsü. Yimten nung akoktsü atema sen-a mamshitsüla aser tashiyim agia meinyaktsüla. Item jagi akokbaji takok masü saka tamakok dang nungi tamajungba jenjang nung oa atemtsü. Takok jenjangji indangindanga takoker nem agütsütsüla aser makokertemia pei tamakokji ajemalua agizüktettsüla. Iba nung jagi dang alima nung tesünep aser yimjiyimjung tenzüktsü.