‘Ishq Forever’ film imlaba ama takok mangu

February 20, 2016 : English film “Chasing Liberty” den mesüktepa yangluba aser Sameer Sippy-i direct asüba “Ishq Forever” film ya meimlaba tesem nung kanga junga takok angu saka takok angutsü imlaba tesem kar nungbo tamakok aluogo.
Iba film nung Ruhi Singh, Krishna Chaturvedi, Lisa Ray, Jaaved Jaffery, Zakir Hussain aser Arif Zakaria nungeri shilem agia lir.
Iba film ya Ato Kiloner’er tetemok jala ka meimtepba otsü lir.
Film otsü nung Riya ama shilem agila Ruhi Singh-i South Africa nung kaket shisatsü bushir aser college indang hostel nung aliba shilem agia lir. Lai kecha talenba küboka melinüba ajanga tebui ki tulu ka nung la kija alitsü melar. Iba sülen kanga memonoi, tebuji India nung Ato Kilonser akümer anungji la yamaji sadoka alitsüji tensa agi memelai aküm.
Kanga sadema alitsü yimya sübaba ajanga lai tebu indang security guard tem dang nungi jena aotsü meranger aser iba nung la yaritsü asoshi lai junga memetetba nisung Aryan Shekhawat (Krishna Chaturvedi) teyari agir aser memeteti lai pa meima akümer.
Ruhi Singh ya actress tajung ka lir aser lai tetemok aiür ka shilem kanga junga agitet. Ajisüaka Aryan Shekhawat (Krishna Chaturvedi)-i nüknarar otsü nung shilem kanga junga magitetba ajanga tena meimtepba scene temji kari kangshir amai film reprangdang achiteter.
Jaaved Jaffery aser Lisa Ray nati kinungtsü aser kinüngbo, Amitabh o Naina na ama shilem agia lir aser tenati asayamenü shilem dena agi. Tena Riya kümzüktsü asoshi inyaker lir. Ajisüaka tena onsara tali asaya menüba ajanga tereprangtsü jangra medemi kümdaktsür aser laktetdaktsür.
Shabbir Boxwala-i züluba action aser drama film nung taruba minute nung kechi ataloktsürar metetadoker alir.
Nadeem Saifi-i music yanglu aser ajia tangatsü kanga ajungbo masü. “Expectations kitni hai re, kya bataye kya sunai” aser “Oh my god,” kenjangtemji kanga junger aser shi nung jangradaktsütsüla kentem lir saka tanüngba kentem ajanga tereprangertem jangra metemdaktsür.
Motor-bike nung arishitepba scene kaji kanga junger saka alakteta ajungbo masü.
Production ajungba ajanga film kanga sangwa tangoktetogo.
Ajak toktsür direction aser script majungba ajanga iba film ya tamakok aluogo.