Ishrat Jahan ji LeT atema bomb pokdaktsütsüpur ka liasü: Headley

Mumbai, February 11 (Agencies): Ano mangatettep tasen ka adoktsüsa Brihostibarnü Pakistan-America nunger kiralongrar, David Coleman Headley-i, 2004 küm Gujarat nung tepsetla, Ishrat Jahan ji kiralongrar telok, Lashkar-e-Taiba (LeT) atema peisasa taküm tenla agüja bomb pokdaktsütsüpur nübo ka liasü, ta shiogo.

US nungi video link ka ajanga India nunger special public prosecutor, Ujjwal Nikam-i ‘tamakok anguba operation’ ka indang asüngdangyaba mapang Headley-i arishi küm 19 aiür, Jahan tenüng süoka liasü. Tamalen la tenüngji LeT commander Zaki-ur Rehman Lakhvi-i Headley nem metetdakja liasü.

Court dang Headley-i ashiba agi, Lakhvi-i pa dang India nung LeT lenir Muzammil Butt leniba nung operation ka tamakok anguba indang metetdakja liasü, iba mapang nungji iba telok nungi tetsür züngsem ka asü ta pa nem metetdaktsü.

Iba operation dak sentakba nungsa Headley-i, “Ibaji police den kahtepba tatalokba ka liasü, iba mapang nungji peisasa taküm tenla agüja bomb pokdakja asütsüpur (tetsür) ka kahset,” ta ashi.

Headley-isa, “LeT nung tetsür kongsang ka lir, aser iba nungji nisung ka tenüng agi Abu Aiman tetsü lenir lir,” ta ashi.

2004 küm June 15 nü Ahmedabad yimti tezülen Gujarat police den kahtepdang nisung pezü- Ishrat Jahan, Javed Shaikh, Amjadali Akbarali Rana aser Zeeshan Johar nunger tepseta liasü.

Iba mapang nungji city crime branch-i, asürtemji LeT kiralongrartem lir aser parnokji Gujarat chief minister Narendra Modi tepsettsü atema aoba liasü, ta ashi.

Iba ken oji Gujarat high court-i shimba SIT ket nungi CBI-i nem agüja liasü, aser panokibo, iba raraji yazü, ta shia liasü.