ISI-i LeT, Jaish nem training agütsür: Musharraf

Karachi, Feb. 11 (Agencies): Tanü Brihostibarnü taoba mapang Pakistan yimsüsür, Pervez Musharraf-i, ISI-i LeT aser Jaish kiralongrartem nem training agütsür, ta ashiba den külemi New Delhi-i Kashmir onük atema meinyakra kiralongrartemi India maneni amaktsü, ta ashi.
India Today TV-i interview agidang taoba mapang mitkar tashi amshia Pakistan yimsüsür Mushraff-i, “Inter-Services Intelligence (ISI)-i Jaish-e- Mohammad (JeM) aser Lashkar-e-Taiba (LeT) kiralongrartem nem training agütsür,” ta ashi.
India-Pak yimjung maparen nung terenlok ali asü, ta asüngdangba langzüdang pai, “Nenoki (India) tongtibangtiba onük (Kashmir) jembira ajakji anentsü. Asenoki tongtibangtiba onük atema meinyak tashi kiralongraba alitsü aser telungpur tebilemtsü alitsü,” ta ashi.
“Kashmir nung rarar ajakji nüjiso atema rarar kaka lir,” ta pai ashi.
“Tongtibangba onük atema asenoki meinyaktsü ama ni bilemer. Nenoki yamaji mesüner. Nenoki kiralongraba onük, Mumbai aser Pathankot amakba onüktem dang jembiner,” ta paisa ashi.