ISI nem osang agütsür agent ka aser BSF sepai ka apu

New Delhi, November 29 (Agencies): Pakistan nunger Intelligence agency, ISI nem miim osang agütsüba maparen ka Deobar nü Delhi Police, Crime Branch-i putetogo aser agent ka densema ISI nem linük security indang miim osang agütsür Border Security Force (BSF) head constable ka puogo.
Police-i ISI agent ji puogo aser pa den inyakertema aputsü atema inyakdagi. ISI agent aser BSF constable napronglaji Jammu nung aliba railway station nung apu, ta osang ajanga ashi.
Linük security indang miim osang kakettem aika puogo, ta Crime Branch Joint Comissioner, Ravindra Yadav-i Times of India (TOI) dang ashi.
ISI agent ji Jammu & Kashmir, Rajouri district nung alir arishi küm 44 Kafaitullah Khan (Master Raja), aser BSF head constable sangji kasa district nung Border Security Force Intelligence wing nung inyaker Abdul Rasheed lir, ta Ravindra Yadav-i ashi.
“Khan ya Pakistan Intelligence Operative (PIO) ketdangser lir aser Rasheed ya pa nem osang agütsür tongti rongnung ka liasü. Miim osang prokbaji tenati inyaker aser Pakistan nunger ISI-ia pusemer,” ta Yadav-i ashi.
Tenaprong anema IPC aser Official Secrets Act kübok section balala nung ken o aika benokogo, ta paisa shisem.
Pakistan Intelligence Operative-i sponser süa India linük anemba maparen osang lazükba sülen Delhi Police nung Crime Branch-i network ka tentet aser melung malemtsüsa nisung kar jangjateta liasü, ta police ketdangser kati ashi.
Jammu nung Brihostibar nü Khan train kati ayaketa atu aser Bhopal-i aotsü liasü, ajisüaka yangji police-i pa apu aser pa ket nung linük security kakettem aliba apu, ta paisa ashi.
Crime branch-i Delhi aser Jammu & Kashmir na nung aliba tesem trok nung mita odagi.