ISIS ‘caliphate’ aser ‘Hindu Rashtra’ tsüngda tepila mali

Tanü alima nung ISIS ta ajaba Islamic kiralongrar teloki linük balala nung ozüng alema mapa inyakba aser talisa Khristantem dak tenük yoka reshikangshiba aser tepsetba ajanga, linük aikati iba telok ya alima nung khuret ka ta züngshia, parnok anema mapa inyaker. ISIS anema raraji United States (US) tongti sür inyaker aser tang tashi nung alima nung linük 68-i US den yaritepa ISIS samatsütsü atema mapa balala inyakdar. ISIS indang nükjidongji ‘caliphate’ ka tentettsüba aser iba tetezüji Muslim yimsüsür ka kübok yimtenyimli ka tenzüktsüba lir. Parnok indang nükjidongji, Sharia ozüng kübok Islamic yimli ka tenzüktsü aser iba yimli jagi alima madak yimsü asütsü indang lir. Asenoki tatalokba meyipa reprangdangra, ISIS-i Khristantem anema mapa inyaker aser parnoki par yimli atema mapa inyakyonga arudang, tenlaki aika raksatsüogo aser Khristantem aika tepsetogo. ISIS-i meimchir anema aser taochi melii inyaksangshiba atema alima nung linük aikati tebilemtsü aben aser parnoki ISIS anema raratsü aser mapa inyaktsü mulungtet aser iba telok samatsütsü meranger. Ajidang masü, alima nung telok tematiba United Nations (UN) tsüngdang ISIS anema ken o benokba aser osang agütsüba nung ajemdaker UN Security Council-ia iba telok aitsüogo aser UN-i ISIS ji ‘kiralongrar telok ka’ ta züngokogo. Asenok aliba linük, India nunga reprangdangra, tali bilemloka oa amanger Hindu nungertemi ISIS mesüka inyaksangshiba angur. Hao, India ya Hindu nunger nütsüng teimba sür aliba linük ka asünung, mapang shia nübo agi tangar memenepba telok mesüra yimsütem dak Hindu nungeri ozüng alema mapa inyakbaji ataloka arur. Ajisüaka, tawa tanü ka India nung Muslim aser Khristantem anema mapa inyakba kanga bulua ataloker aser asenokia item osang balala angashia arudar. 2014 küm Centre nung Bharatiya Janata Party (BJP)-i sorkar akümba sülen nungi Hindu teloktemi nübo agi tangar memeneper aser Khristantem anema kanga dang bulua mapa inyaktsü tenzük. BJP-i sorkar ketdang asüba state aika nung reshikangshi ajurur aser state aika nung sorkari nashi metepsettsü aser nashishi machitsü/yokyayokji masütsü indang ozüngtema yanglua tenokdangbatem agütsüogo. Iba ya ajanga BJP ji Hindu tangatetba aser tesayuba sülen anidakba telok ta sayur, kechiyong Hindu nungeri nashiji par tsüngrem ka ama külemer. Kechiba BJP lennirtem aser yimten yimsüsürtemi yamai inyaker ta süra, BJP ji Rashtriya Swayamsevak Sangh (RSS) indang yimtenren kongsang ka ama lir aser parnoki ‘Hindu rashtra’ ka tentettsü alizüng lir. ‘Hindu rashtra’ tetezüji Hindu linük lir aser Hindu nunger teloktemi India ya Hindu linük ka kümdaktsütsü atema alizüng lir. RSS tanishisang Mohan Bhagwat-i ‘India ya Hindu linük ka lir” ta shiogo aser külen Uttar Pradesh Chief Minister Adityanath Yogi-ia “Hindu Rashtra indang bilemba atema kecha tai mali. Supreme Court-ia Hinduism ji nisung taküm libaliroba yimya ka dang lir ta shiogo” ta ashi. “Hindu linük ka akümba ajanga nübortem taküm tajungba litettsü aser parnoki tepela angutsü süra, nisung shingaia Hindu linük ka akümtsüba anema menokdaktsüla aser mebilemtsüla” ta Yogi-isa ashi aser pai jembiba olenji BJP-ia pusema nungitogo. ISIS-i alima nung Muslim yimsüsür ka kübok ‘caliphate’ tentettsüba aser India nung Hindu nungeri ‘Hindu rashtra’ tentettsüba tangatetba tsüngda kecha tepila mali aser iba tangatetba anaprong nung lendong tulu keta lir. Linük nung sorkar ketdangsüba yimtenren telok kati yamai odiodia Hindu linük ka akümtsü atema jembiba aser mapa inyakba pusema nungitra, tanüngba tamangba yimsütem kechi tia nung yutsür aser parnok kechi jenjang nung lidar ta asübaji jungjunga shisadangtsüla. Khristantem mesüra Muslim nunger anema mapa inyakba atema aiben telok aser kijatemi Centre sorkar dangi, Prime Minister, Home Minister mesüra India Tir mesüra state chief minister tem dangi temepishishiba shiditem aiben züluogo. Ajisüaka, India linük nung yimten yimsüsür aser tematiba jenjang nung ketdangsertem teimba Hindu nunger dang asünung, aser parnok nübo teimba sür India linük ketdangsür asünung, Khristan aser Muslim nungeri aginüba ama mataloki mesüra telangzüba tajung mongui dang arur. Anungji, ISIS-i ‘caliphate’ tentettsüba nükjidongji majung aser lendong keta lir ta alimai ajiteta, iba telok samatsütsü atema mapa inyaker süra, India nunger Hindu nunger masüba nisung aser teloktemia India sasep nung takhangba agütsüba mesüra temepishiba shiditem mezülui, United Nations dangiang indangindanga iba khuret indang zülutsüla. Aji asünungdang, India nung Hindu nungeri tanüngba nübo agi memenepertem reshikangshiba mesüra amakba khuret ya alimai jungkai adoka metettsü aser iba sülen jiang iba khuret ya azüoktettsü.