ISIS-i Egyptian Christian tem amokmerener

February 24, 2017 (Agencies) : Brihostibar anepdang Sinai nung Islamic kiralongrartemi Coptic Christian ka par kidang kahset, ta ketdangsertemi metetdaktsü.
Ita ka tsüngda Islamic kiralongrartemi Khristan tamanger 6 tashi tepsetogo aser ibaji ajanga iba tesem nungi Khristan kibongtem aika tangaleni jena aoer.
Brihostibarnü Sinai kübok el-Arish jila nung kiralongrartemi Kamel Youssef’er kidangi ao aser par kinungtsü aser tanurtem jakdang pa kahset, ta ketdangsertemi metetdaktsü.
Yakünü kiralongrartemisa Coptic Christian ka tepset aser par jabaso mi agi rongset aser iba sülen tasümang anaji el-Arish nung lenmang ka anasa yutsü.
Islamic State kiralongrar teloki tawa tu video ka sayaba nung Egyptian Christian tem amokmerenogo.
December 2016 nung IS kiralongrartemi Coptic Christian tenlaki ka amak aser iba mapang Egyptian Christian 28 tashi tepset aser 50 shi yiru. Egypt linük putiotsü nung Khristantem tamajungtiba amakbaji iba ya liasü, ta taoba mapang ChristianHeadlines.com ajanga metetdaktsü.
Egypt nung Coptic Christian tem reshikangshiba inyakyim kanga bulua inyaker. Taoba hopta ISIS kiralongrartemi Egyptian Christian school tesayur ka tepset. Ano, Egyptian Christian temi tenlaki yanglutsü atema tenokdangbatem agüja lir.
Islamic State-i sayaba video nungji Christian tem amakbaji tetenzüker dang lir ta shia lir.
Minute 20 shi indang video nung parnoki tenük yokba telokji Khristantem lir ta Islamic State-i shia lir.
Iba video nung yaküm tenlaki nung nisung 30 shi tepsetba nisung- Abu Adbullah al-Masri indang noksa kar sayua lir.
Muslim nunger teimba ser aliba Egypt linük nütsüng yongsük nungi shilem 10 shi ka Khristantem lir.