ISIS-i Israel linük dang tsübur: Jurgen

London, January 03 (Agencies): Alima nung ISIS kiralongrar teloki tsübuba linükji Israel linük dang lir, ta ISIS tesemtemi ia taküm kümzüka liteter anüolen nungi mezüngbuba osangbener kati ashi.
Yaküm osangbener Jurgen Todenhofer anogo 10 nü tashi Islamic State nung liasü, aser pai ngutetbatem aser ajangshibatem kaket ka nung züluogo.
Jewish News den interview agiba mapang Germany nunger osangbener Jurgen-i, ISIS-i Middle East nung agitsü linüktem mezüngbuba shilem renemba nung Israel linük densema mali, ta ashi.
“ISIS-i tsübuba linükji Israel kija – parnoki (ISIS) kü dang Israel sepaitemji parnok atema kanga tashi tait ta shiogo,” ta Todenhofer-isa ashi.
“Parnoki ali nung rarar US aser UK sepaitem akoktsü ta bilemer, parnokji (US/UK sepaitem) yimti sepaitem mesüra kiralongrar asalendongtem nung experience mali ta parnoki ashir,” ta paisa shisem.
“Ajisüaka sepaitem aser kiralongrartem anema raratsü atema Israel nungerbo kanga tashi tait ta parnoki metet,” ta Jurgen-isa metetdaktsü.
Taoba mapang yimtenren nisung Jurgen-i, pai ajuruba ISIS telungpurtemi British mesüra America nunger sepaitem metsübur ta shiogo saka Israel nunger Defence Force temji ‘atangji lendong’ ta bilemer, ta ashi.
ISIS-i video balala ajanga Israel linük aser Yihuda nungertem aiben amokmerenogo, aser yaküm October ita nungbo par teloki Yirusalem nung Yihuda nunger kata manüngtsüi samatsütsü aser alima nungi Yihuda tashitak samatsütsü ta nangzükogo.
ISIS telok den densemba teloktem Gaza nung yakyaka liaka kiralongrartemi tanü tashi Israel linük amakba osang mali aser par teloki Occupied Palestinian territory tem tang tashi nungbo agia mali.
Todenhofer-i ashiba agi, ISIS den medemdangra al-Qaeda telok yabo tilateri ka dang.
US leniba nung alima linüktemi Iraq aser Syria na nung bomb ajanga ISIS amakba nung Israel densema mali, ajisüaka Israel nunger intelligence service ajanga USi aniba telok nem osangtsüsang agütsür südi ta bilemer.