ISIS-i Khristan jila nung tanurtem dena nisung aika tepset

Qaryatayn, October 24 (Agencies): Islamic State kirlaongratemi Qaryatayn jila nung tetsür aser tanurtem densema nisung aika tepset ta osang angazüker.
Iba jila nung Khristantem aika liasü aser taoba hopta Syria sepaitemi ISIS ket nungi agia liasü saka ISIS-i civilian tem aika tepsetba kuli angu.
“Item nisungtem yagi Tsüngrem memetet kechiyong parnok kecha memetet. Parnoki tanurtem aser tetsürtem kotari agi tsüngset, züka merenshi aser parnok tetsüng-teben sükdangtsü” ta jila nung alirtemi ashi.
Iba jila nung kwika tepsetar memetet saka The Associated Press-i nisung 67 tepset ta ashi. Külen Homs province Governor, Tala Barazi-i nisung 60 dak tema asü aser 100 samar bushir ta metetdaktsü.
Ano, külen The Syrian Observatory for Human Rights-ibo 128 tepset ta metetdaktsü.
Taoba mapang jila nung alir Abdullah AbdulKarim-i ashiba agi, tang tesüsabuba nisungtem tepsetbaji mang ayangba inyakyim ka lir.
“Parnoki nisungtem tenüng tarensen ka bener aru aser ISIS kiralongrartemi kilen shia bushiyonga ao” ta paisa shisem.
Syria kübok Qaryatayn ya Khristantem teimba sür aliba jila ka liasü aser 2015 küm ISIS-i iba jila atsünga agi, ta International Christian Concern-ia metetdaktsü.
Syrian sepaitem aser ISIS kiralongrartem tsüngda iba jila agitsü asoshi aiben rara aser tatemsa tan ita tetenzüklen ISIS-i tanaben iba jila atsünga agia liasü.