ISIS nung adentsü ajungshir, IOC nung inyaker ka puogo

Jaipur, December 10 (Agencies): State nung Anti-Terrorist Squad (ATS)-i linük nung nokdanger aliba kiralongrar telok, ISIS atema inyaker, ta tai tonglokja arishi küm 30 tain, Mohammed Sirazudin Jaipur yimti, Jawahar Nagar tesem nungi Bodhbar nü puogo.
Iba nisungba ya yimti nung aliba Indian Oil Corporation (IOC) nung marketing manager inyaka liasü aser pai social networking ajanga Muslim lanurtem ISIS telok nung adentsü ajungshir.
ATS nung ketdangsertemi Mohammed Sirazudin indang maparen ita asem tashi mita liasü.
“Onoki Facebook aser danga social networking apps tem ita asem mita osang tejangja ngutetba sülen ‘Unlawful Activities (Prevention) Act’ kübok iba asangur apu,” ta ATS ketdangsertemi metetdaktsü.
Bodhbarnü TOI den jembidang ATS Additional Director General (ADG), Alok Tripathi-i “Pai India nung nokdanger aliba ISIS telok nung adentsü asoshi Facebook, WhatsApp aser Telegram apps ajanga tesüiba ita pongu kanga bendanga agüja inyaka liasü,” ta ashi.
Tripathi-isa, “Pa ya ISIS asoshi inyaker ka liasü, kechiba süra pai ISIS inyakyim ajungkettsür aser nüburtem dang iba telok nung adentsü ajungmesor,” ta ashi.
Sirazudin ya Karnataka state kübok Gulbarga nungi lir aser pai linük nung ISIS-i tuyuba tashi angaa parnok asoshi nübu yimtsüba dak sentakba nung apu, ta Tripathi-i shisem.
“Osang ka lazükba sülen ozü teloki pa indang WhatsApp, Facebook aser Telegram account tem mitsü tenzük,” ta paisa ashi.
“Pa ket nungi ISIS indang online magazine “Dabik”, noksa aser video kar den temulung malemtsüsa oset kar onoki nguteta lir,” ta pai shisem.
Pai Facebook nung ‘Dairy of a Mujahidhin’ ta ser page ka ajanga linük inyakyim ajanga mulung mesüi alir lanurtem bushir, ta Tripathi-i ashi.
Pa ya Brihostibarnü court ka matsüngdangi anir aotsü.
Iba dak sentakba nung ano nisung kar danga aputsüsa lir asü (?) ta asüngdangba langzüdang police ketdangser kati, “State nungibo malitsü südi, saka linük tesem kar nung aputsüa akok,” ta ashi.