ISIS onük nung Home Ministry senden kadagi

New Delhi August 01 (Agencies): Islamic State of Iraq & Syria (ISIS) kiralongrar teloki India linük amokmerenba sülen iba tensa reprangshimtsü asoshi New Delhi nung Honibar nungi tenzüka Union Home Ministry-i state balala nungi home secretary tem aser DGP tem den temaba jenjang nung senden agitsü tenzükogo.
Tanü senden nung mendenbubaji Union Home Secretary LC Goyal liasü aser taruba senden tem nung ISIS inyakyim anema noktaktsü atema kechi inyakyimsa inyakdar, iba indangji lemteptsü.
Senden nung lanurtem kiralongrar telok IS nung adenba tebilemtsü onük-a süoka jembitsü sentong lir.
Item senden nung Jammu & Kashmir, Uttar Pradesh, Telangana, Punjab aser West Bengal densema state 12 nungi ketdangsertema adentsü imlar.
Libya nung IS teloki pua aliba India nunger pezü rongnungi nisung ana chiokba sülen anogo ka lir tanü iba senden menogo.
India nunger tesayur pezü Tripolis aser Tunis na nungi India-i aruba mapang IS telungpurtemi pua liasü.
Par pezüji- Hyderabad nungi professor ana, Raichur nungi tesayur ka aser Bengaluru nungia tesayur ka liasü.